Vaksina e kompanisë Pfizer/BioNTech kundër COVID-19 është shumë efektive në parandalimin e komplikimeve të rënda dhe shtrimit në spital deri në 6-të muaj pas dozës së 2-të, thuhet në një studim në Shtetet e Bashkuara.
Studimi, i botuar në revistën mjekësore Lancet më 4 tetor, thotë se efektiviteti i vaksinës mbeti në 90% për të paktën 6-të muaj pas dozës së 2-të në parandalimin e shtrimit në spital.
Madje, studimi thotë se ajo kishte të njëjtën masë efektiviteti edhe kundër variantit shumë ngjitës të koronavirusit Delta.
Megjithatë, efektiviteti i vaksinës kundër infeksionit bie me kalimin e kohës, me 88% gjatë muajit të parë pas vaksinimit të plotë, ndërsa pas 5 muajsh në 47%.
Autorët thanë se zvogëlimi i efikasitetit të vaksinës Pfizer/BioNTech vjen kryesisht për shkak të dobësimit të imunitetit me kalimin e kohës, dhe jo për arsye të variantit Delta.
Të dhënat e këtij studimi janë përdorur nga agjencitë shëndetësore amerikane për të rekomanduar një dozë përforcuese të vaksinës.
Studimi u bazua në regjistrat elektronikë të shëndetit të afro 3.4 milionë njerëzve në Shtetet e Bashkuara.
Studimi u botua në të njëjtën ditë kur rregullatori i barnave i Bashkimit Evropian miratoi dozën përforcuese të vaksinës Pfizer/BioNTech COVID-19 për njerëzit 18 vjeç e lart, transmeton REL.
Agjencia Evropiane e Barnave tha më 4 tetor se dozat përforcuese “mund të jepen të paktën 6 muaj pas dozës së 2-të”.
