Agjencia Europiane e Barnave EMA ka miratuar përdorimin e dozës së tretë të vaksinave te personat me imunitete të dobët. Kjo u njoftua këtë të hënë përmes një deklarate, në të cilën theksohet që doza e tretë duhet të aplikohet pasi të kenë kaluar 28 ditë pas dozës së 2-të.
Rekomandimi vjen “pasi studimet treguan se një dozë shtesë e vaksinave Pfizer dhe Moderna rrit aftësinë për të prodhuar antitrupa kundër virusit të COVID-19 në pacientët me sistem imunitar të dobësuar”, thotë EMA.
Ndërkohë, sipas një studimi, doza e tretë mund të mos jetë e nevojshme për të gjithë njerëzit. Për Laboratorin Neuroimunologjik të spitalit Santa Lucia IRCCS në Romë, doza e dytë e vaksinës anti-Covid prodhon jo vetëm përgjigjen e antitrupave, por gjithashtu krijon kujtesën imunologjike, të aftë për të mbrojtur personin në një afat të gjatë, raporton A2news.
Studimi konfirmon praninë e limfociteve T të kujtesës për të paktën 6 muaj nga doza e parë e vaksinës, duke konfirmuar zhvillimin e një përgjigjeje qelizore që ruhet me kalimin e kohës. Prandaj, për subjektet e shëndetshme, studiuesit vërejnë se doza e tretë e vaksinës mund të mos jetë e nevojshme.
