Kryeministri i Kosovës, Albin Kurti, ka marrë pjesë në mbledhjen e bordit të Aleancës Progresive.
Në këtë mbledhje, Kurti foli për tri çështje, atë të lëvizjes e qeverisë që ai e udhëheq, për gjendjen e demokracisë dhe nevojën për paqe të qëndrueshme.
Gjatë fjalës së tij, Kurti përmendi kohën e themelimit të Lëvizjes Vetëvendosje, kohën sa ishte opozitë e deri tek koha kur Kurti u bë shef qeverie për herë të parë.
“Ne u angazhuam dhe protestuam, sepse donim që idetë tona dhe kauza jonë të dëgjoheshin. 15 vjet më vonë, pas shumë protestave dhe demonstratave, arrestimeve dhe zgjedhjeve, kur ndodhën kaq shumë procese që formësuan vendin tonë dhe ne, më në fund erdhëm në pushtet. Ishte data 6 tetor 2019, por për shkak të disa ngjarjeve fatkeqe, ajo qeveri ishte jetëshkurtër dhe u rrëzua në mes të pandemisë COVID-19, të cilën ne e menaxhuam jashtëzakonisht mirë. Por pastaj, këtë vit, në zgjedhjet e 14 shkurtit, ne fituam me një fitore bindëse. Gara jonë ishte kundër atyre që udhëhoqën për dy dekada dhe përdorën para të korruptuara dhe institucione shtetërore për t’i bindur votuesit, përderisa ne garonim me idetë tona. Fitorja jonë më 14 shkurt tregon se ka fuqi në ide, se ka fuqi në të qenit i ndershëm dhe i denjë; në të qenit parimor dhe të udhëheqjes me shembull”, ka thënë Kurti në fjalën e tij në këtë mbledhje.
Me tej, Kurti tha se tani si kryeministër do të qeveris me të njëjtat parime që evokuan sa ishin në opozitë, sepse sipas tij, besojnë se demokracia nuk është e nevojshme vetëm për t’i fituar zgjedhjet, por edhe për të qeverisur.
Kreu i Vetëvendosjes përmendi edhe programin qeverisës, duke thënë se ai u përgjigjet dy çështjeve urgjente për qytetarët e Kosovës: punësim dhe drejtësi.
“Qytetarët duan një shtet demokratik që respekton dhe mbron të drejtat e njeriut dhe të drejtat civile, një shtet i cili funksionon bazuar në sundimin e ligjit, lirinë e medias dhe lirinë e fjalës. Ata duan një sistem të pavarur dhe profesional të drejtësisë që jep vërtet drejtësi dhe një qeveri që punon për të gjithë, pavarësisht prejardhjes dhe të ardhurave”, ka thënë Kurti.
Ai gjithashtu tha se besimi në institucionet kryesore të Kosovës kurrë nuk ka qenë më i lartë, duke thënë se tri institucionet që dolën nga zgjedhjet e 14 shkurtit, Presidenti, Kryetari i Kuvendit dhe Kryeministri gëzojnë mbi 50 përqind të besimit të qytetarëve.
“Si rezultat, tani më shumë qytetarë janë të gatshëm t’i paguajnë tatimet dhe faturat, gjë që ka rezultuar në të hyra më të larta buxhetore. Shumë prej tyre gjithashtu konkurrojnë për vende të punës dhe pozita të reja sepse e dinë që nuk ka parregullsi dhe vlerësimi është më i drejtë. Kjo tregon se ndryshimet demokratike kanë një efekt përhapës në të gjitha fushat e jetës dhe mund t’i fuqizojnë qytetarët dhe ta forcojnë demokracinë”.
Sa i përket çështjes së dytë, atë mbi gjendjen e demokracisë, Kurti tha se kjo në vitet e fundit ka qenë sifudese por edhe shpresëdhënëse.
“Demokracia në të gjithë botën është nën kërcënim nga autokratët në rritje që keqpërdorin instrumentet e demokracisë, si zgjedhjet e lira dhe mediat e lira, për të përhapur kauza të rreme dhe informacione të rreme dhe për të paraqitur një realitet të shtrembëruar sepse i synojnë instinktet dhe impulset më të këqija të njerëzimit. Kjo nuk është diçka e re. Ne kemi qenë dëshmitarë të valëve dhe fushatave të tilla më parë, por ajo që është e re janë mjetet që i kanë në dispozicion, siç janë rrjetet sociale dhe paaftësia jonë për t’u bashkuar dhe për ta mbrojtur demokracinë”, është shprehur Kurti.
Ndërsa, sa i përket paqes, Kurti tha se në Evropë, paqja e qëndrueshme ishte e mundur vetëm pas pranimit të përgjegjësisë pas Luftës së Dytë Botërore dhe përqafimit të demokracisë së vërtetë, njofton Klan Kosova.
“E ngre këtë çështje sepse besoj se çështjet e pazgjidhura mes Kosovës dhe Serbisë, 22 vjet pas luftës, ekzistojnë vetëm sepse Serbia nuk ka marrë përgjegjësinë për luftërat e shkaktuara në vitet ’90 dhe sepse ata kurrë nuk janë demokratizuar me të vërtetë. Edhe sot e kësaj dite ata refuzojnë të pranojnë gjenocidin në Bosnjë edhe pas vendimit të GJND-së. Unë vërtet besoj se këto dy procese janë të lidhura – pranimi i përgjegjësisë dhe demokratizimi. Të jesh një demokrat i vërtetë do të thotë të besosh në barazinë e të gjitha qenieve njerëzore dhe t’i gjykosh të tjerët jo nga prejardhja dhe përkatësia etnike, por nga përmbajtja e karakterit të tyre. Për sa kohë që Serbia udhëhiqet nga njerëz që refuzojnë të përballen me të kaluarën e tyre dhe vazhdojnë ta shohin etninë dhe fenë e tyre si superiore ndaj të tjerëve, paqja e vërtetë është ende larg që të arrihet”, ka thënë ai.
