Besnik Tahiri, reporter në Klan Kosova, i ftuar në Rubikon, ka thënë se situatën në pikat kufitare KFOR-i ka qenë duke e vëzhguar qysh ditën e parë në masë të madhe, por ngjarja e djeshme ka bërë që NATO-ja të jetë më aktive ditën e sotme.
“Prezenca e KFOR-it ka qenë më e madhe sesa sot numerikisht edhe me helikopterë. Por ajo që ka ndodhur dje e ka qu prej gjumit edhe NATO-n. Pra pas vizitës që i bëjnë Rudnicës, ministri i Mbrojtjes së Serbisë, Nebojsha Stefanoviq dhe ambasadori rus, Alexander Botsan-Kharchenko”, ka thënë Tahiri.
“Vetëm disa metra larg godinës ata japin deklarata dhe jo çfarëdo deklarate, direkt kërcënuese, dhe kjo e ka bërë KFOR-in të veprojë pak më ndryshe”, ka shtuar ai.
Prandaj, sipas tij, komandanti i KFOR-it qysh në mëngjes sot e ka takuar kryeministrin e Kosovës dhe pas tij ka takuar kryetarët e katër komunave në veri, dhe i ka dhënë një propozim se si të dilet nga situata aktuale mirëpo, Tahiri thotë se si duket përfaqësuesit politikë të serbëve kanë refuzuar këtë propozim.
“KFOR-i, e ka me mandat sigurimin e lirisë së lëvizjes në Kosovë. Gjithçka ka të bëjë me mandatin e KFOR-it. KFOR-i edhe herëve të tjera ka reaguar në mënyrë urgjente”, ka theksuar ai.
“KFOR-i është përgjegjësi i tretë për siguri, nëse Kosova kërkon ndihmë ajo i përgjigjet kërkesës”, ka thënë ai.
Sipas Tahirit, aktivizimi i NATO-s në pikat kufitare në Jarinjë e Bërnjak vjen edhe pas vendosjes së tankeve serbe në afërsi të kufirit.
“Dhe për shkak të tankeve ushtarake që i ka përdorë Serbia të quajtura Milosh dhe Jovan, janë të vendosura 2 km larg, prandaj e kemi pasur këtë diplomaci ushtarake”, ka shtuar ai.
