Hyrjen në kafenë më certifikatë të vaksinës si dhe hapja e shkollave nga dita e hënë, po mirëpriten nga qytetarët e Prishtinës.
Madje, ata kanë vlerësuar se këto masa do të duhej të merreshin më herët, derisa i cilësojnë si të vonuara. E disa prej tyre kanë shprehur gatishmërinë që të marrin edhe dozën e 3-të të vaksinës, anti-Covid.
Sipas, Skender Hajdini masat janë të drejta, pasi që për shtrëngim të masave faji qëndron te qytetarët, derisa thotë se nuk po i respektojnë vet masat qytetarët.
Edhe vendimin për hapjen e shkollave dhe të çerdheve, ai po e konsideron të duhur, pasi që sipas tij nxënësit dhe mësimdhënësit kanë pasur vështirësi në gjetjen e pajisjeve teknologjike.
“Masat janë shumë të drejta, dhe e 2-ta shiko për rreth asnjëri hundën nuk e ka të mbuluar, vet fajin e kemi na që po naj futin masat e reja. Ajo është në rregull pasi që e dimë se shumica nuk kanë qasje në kompjuterë dhe më mirë është ashtu”.
Shtrëngimin e masave po e sheh të nevojshëm, Faik Salihu, pasi që sipas tij, nuk po respektohen sa duhet.
Ai ka bërë thirrje te qytetarët që të vaksinohen, derisa theksoi se është i gatshëm ta merr edhe dozën e 3-të të vaksinës.
“Masat janë sipas qeverisë janë të nevojshme për këtë popull, ky Covid po e zë vendin e parë në botë për nga vdekja, dhe faktikisht duhet mi shtrëngua masat, duhet mi marr vaksinat, dhe me më thanë edhe të 3-ën e marr, dhe nuk është problem, duhet ti respektojmë masat meqenëse na tybe i respektojmë”.
Edhe, Sadik Mehmeti thotë se Qeveria ka vepruar mirë, në marrjen e vendimit të masave të reja për parandalim të Covid-19.
“Bravo i qoftë që i kanë bërë këto masa, moti është dashtë me i bë, ishallah shkojmë përpara, sepse kjo situatë nuk na ka shkuar mirë dhe prej se ka marr Albini ndoshta është ma gjallë”.
Ndërsa masat që priten të miratohen në mbledhjen e Qeverisë, detyrojnë institucionet shtetërore dhe institucionet private të paraqesin certifikatën e vaksinimit para hyrjes ku operojnë, përfshirë: Qendrat tregtare; Call center; Gastronomia në ambientet e brendshme, dhe të gjithë punonjësit në institucionet publike dhe private që kanë punë me palë.
Shkollat dhe çerdhet do të hapen nga dita e hënë, 27 shtator, maksimumi i nxënësve do të jetë 20, raporton EO.
Aktivitetet sportive mund të kenë prani të shikuesve deri në 10% të kapaciteteve në ambientet e brendshme, duke pasur certifikatën e vaksinimit ose një nga 3 dëshmitë alternative; pra testin PCR, serologjik ose testin rapid antigjen. Kurse, në ambientet e jashtme deri në 30% të kapaciteteve.
