Mësimi zyrtarisht po fillon nga e hëna.
Me prezencë fizike e sipas skenarit A shkollat tashmë thonë se janë gati dhe se janë në përgatitjen finale të grupeve të nxënësve.
Një grup nuk duhet të përfshijë brenda klasës më shumë se 20 veta, njofton Klan Kosova.
E në shkollën “Pavarësia” në Prishtinë, që kanë numër të madh të nxënësve, thonë se e kanë goxha sfidë t’i menaxhojnë oraret e mësimeve.
Një sfidë tjetër, për drejtuesit e shkollave po del të jetë edhe prezenca e grave shtatzëna në punë, të cilat me vendimin në fuqi të qeverisë, kanë mundësi të punojnë nga shtëpia e për të njëjtat ende nuk ka asnjë mënyrë zëvendësimi.
Kjo situatë sipas sindikatës për arsim duhet të zgjidhet patjetër.
Sa i përket zëvendësimit të mësimdhënësve në Ministrinë e Arsimit nëpërmjet postës elektronike thonë se kjo është kompetencë e komunave si punëdhënëse dhe se qeveria nuk ka marrë ndonjë vendim për këtë çështje, njofton Klan Kosova.
Në anën tjetër Drejtoresha e Arsimit në Komunën e Prishtinës, Shpresa Shala, tha se komunat nuk mund të punësojnë mësimdhënës shtesë jashtë numrave të cilat janë të miratuara nga niveli qendror dhe se Prishtina nuk e ka asnjë vend tepricë.
