Opinionisti Shkëlzen Gashi ka thënë se vendimi i Qeverisë për mos lejimin e përdorimit të targave serbe në territorin e Kosovës është tejkalim i Marrëveshjes së Brukselit. Ekzekutivi kosovar ka deklaruar se mbështetet në zbatimin e kësaj marrëveshje për vendimin e targave.
Gashi në Rubikon të Klan Kosovës ka theksuar se me këtë verdikt, që ka hyrë në fuqi tash e tre ditë, Kosova del më e fortë në pozicionin negociator me Serbinë dhe me Bashkimin Evropian.
“Marrëveshja e Brukselit është tejkaluar në dy pika, e para është duke u ndaluar përdorimi i targave KS në territorin e Kosovës, e dyta Qeveria e Kosovës ka marrë vendim që targat RKS të kenë të drejt me u fut edhe në territorin e Serbisë. Kjo nëse Serbia nuk pranon që targat RKS të qarkullojnë lirshëm në territorin e Serbisë, atëherë as targat e Serbisë nuk do të përdoren në Kosovë, por do të kenë targa provuese. Këtë nuk e gjeni askund në marrëveshjen e Brukselit, kjo marrëveshje nuk thotë askund që targat RKS të automjeteve të Kosovës të munden të qarkullojnë lirshëm në Serbi, kjo është tejkalim i marrëveshjes së Brukselit.
“Pikat 6 dhe pika 8 të Marrëveshjes së Brukselit të vitit 2011 thonë ‘Si masë kalimtare autoritetet në Kosovë do të vazhdojnë vlefshmërinë e targave KS të automjeteve për një periudhë fillestare prej pesë vitesh, në përfundim prej së cilës çështja do të rishikohet nga të dyja palët në lehtësimin e BE-së nëse kërkohet’. Në pikëm 8 thuhet ‘Si masë e përkohshme autoritetet në Beograd do t’ua mundësojnë autoriteteve nga Kosova që të bartin targat KS të qarkullojnë lirshëm në dhe përmes territorit të Serbisë’”.
“Ndërsa, Marrëveshja Brukselit e vitit 2016 që është pesë vite mbrapa asaj të vitit 2011, në pikën 4 të saj thuhet ‘Regjistrimi i të gjitha automjeteve me tabelat e lëshuara nga autoritetet e Kosovës do të fillojë më 15 janar 2017 do të zgjas 12 muaj’. Pika 5 thotë ‘Kosova do ta zgjasë validitetin e tabelave KS për pesë vite në fund të së cilës çështja do të shqyrtohet nga të dyja palët me ndihmën e BE-së nëse kjo kërkohet’.
“Kosova i tha Serbisë dialog, nëse s’do ne e këpusim. Çka bëri Qeveria e mori një vendim që është reciprocitet, nëse t’i nuk i lejon tabelat e qytetarëve të Kosovës të përdoren në Serbi po u kërkon tabela provuese, atëherë edhe ne do të kërkojmë që tabelat serbe në Kosovë të zëvendësohen me tabela provuese. Kjo nuk është në Marrëveshje të Brukselit, pse vjen kjo? Këtu u tha se ky vendim është legal, nuk e shkel asnjë udhëzim administrativ, as një ligj dhe as Kushtetutën. Ky vendim është legjitim sepse është i drejtë, e dyta kjo e forcon pozicionin negociator të Kosovës karshi Serbisë, ndërkombëtarëve dhe shteteve të Bashkimit Evropian”, ka thënë Gashi.
Ai ka pohuar se ky vendim po ashtu e restauruon dinjitetin e qytetarëve të Kosovës karshi Serbisë, pasi sipas tij për 20 vjet kosovarët kanë qenë të poshtëruar duke i larguar targat e tyre për të hyrë në Serbi. Po ashtu e ka quajtur edhe si një gjetje të mirë të Qeverisë pasi afër janë zgjedhjet lokale të 17 tetorit.
