Vendimi për “reciprocitetin e targave” që ka dërguar Njësitë Speciale të Policisë së Kosovës në pikat kufitare në veri të Kosovës ka “alarmuar” Serbinë. Mbrëmë, forca të armatosura serbe kanë lëvizur drejt kufirit me Kosovën dhe gjithashtu presidenti serb Aleksander Vucic ka mbledhur Këshillin e Sigurisë Kombëtare pas paralajmërimeve të djeshme për “masa të dhimbshme”. Ekspertët e sigurisë në Kosovë i vlerësojnë këto deklarata që bëhen “vetëm për konsum të brendshëm”, dhe jo të rrezikshme në aspektin e sigurisë.
Nuredin Ibishi, ekspert i sigurisë ka deklaruar për Gazeta Metro se këto skenare janë të njohura. Ai tha se nëpërmjet protestesve dhe ankesave tek Komuniteti Ndërkombëtar, Serbia tenton ta paraqesë situatën si kufizim i lirisë së lëvizjes, por që s’ka të bëjë me këtë.
“Këto skenare janë të njohura, puna e asaj që kur bëhet një veprim ligjor kundër krimit të organizuar apo kur mirret ndonjë masë si kjo e reciprocitetit ai menjëherë i ngrit edhe serbët e Kosovës që udhëhiqen nga ministri për Kthim dhe Komunitete por edhe komunitetin ndërkombëtar duke tentuar ta akuzojë palën kosovare se po e kufizon lirinë e lëvizjes por kjo s’ka të bëjë me liri të lëvizjes, është një masë që është vu reciprociteti që edhe kështu i ka kaluar afati që ata e kanë nënshkruar vet.”, tha Ibishi.
Më tutje, ai tha që mbledhja e Këshillit të Sigurisë Kombëtare në Serbi po bëhet që të urdhërohet lëvizja e trupave të Specializuara të Policisë së Serbisë por edhe të Forcave të Armatosura drejt kufirit. Sipas Ibishit, Vucic e di se ku është kufiri deri ku mund të shkojë, por që sipas tij këto veprime bëhen për nevoja të opinionit të brendshëm në Serbi.
“Sot ai mbledh Këshillin e Sigurisë dhe e tija është që të urdhërojë lëvizjen e trupave të specializuara të Policisë por edhe të forcave të armatosura, por ai e di se ku është kufiri deri ku mund të shkojë, por këto janë më shumë për nevoja të opinonit të brendshëm serb se ai në këtë formë kinse shqetësohet dhe kujdeset për mbrojtjen e komunitetit serb në Kosovë që fare nuk ka të bëjë sepse ata nuk rrezikohen fare dhe që këto masa të ngrisin çështje.”, tha ai.
Ibishi ka vlerësuar se Kosova duhet të jetë konsistente në këto veprime deri në momentin kur arrihet marrëveshja që Serbia t’i heqë masat e saj kundër Kosovës, atëherë edhe Kosova t’i largojë ato.
“Kjo situatë është si pasojë e qeverive të mëhershme që ka ndodhur se kur pala serbe ka marrë ndonjë masë ndaj Kosovës, ne nuk kemi reaguar me kohë siç dinë serbët të bëjnë. Sido që të jetë, Serbia do të mundohet me çdo kusht të ngrisë tensione edhe brenda Kosovës por edhe jashtë kufijve të Kosovës, por mendoj se qeveria duhet të jetë konsistente në ndërmarrjen e këtyre masave dhe që këto masa të funksionojnë deri pala serbe t’i heqë të vetat dhe pastaj t’i heqim edhe tonat.”, tha Ibishi.
Më tutje ai shprehet se çdo zbrapsje do të ishte jo-serioze dhe rënie në ndikimin serb. Ai gjithashtu ka thënë se qeveria e Kosovës ka bërë një akt legjitim, ndërsa Bashkësia Ndërkombëtare duhet të reagojë pa anëshmëri.
“Duhet të jemi shumë këmbngulës sepse mund të dalim jo-serioz, dhe realisht biem në ndikimin serb, por është edhe jo-korrekte në raport me neve se edhe BE tha se duhet të përmbahemi nga veprimet e njëanshme, por ajo nuk është e qëndrushme sepse pse nuk reagojnë ndaj një vendimi të qeverisë serbe dhe askush nuk e akuzoi palën serbe për një veprim serb, edhe për targa e çështje tjera, për një vendim siç thonë ata të njëanshëm, por tash kur qeveria e Kosovës përmes një akti legjitim po vepron, ata reagojnë në mënyrë jo të mirë. Mendoj që edhe kombet e Bashkuara do të reagojnë në këtë rast edhe për tabelat RKS që janë legjitime por edhe ato të kohës së UNMIK’ut por edhe tabelat që kanë mbetur ende para vitit 99 që nga koha e regjimit të Milloshevicit që nuk i nënshtrohen siguracionit dhe kjo përbën problem në anëtarësimin e Kosovës për Karton të Gjelbër. Nëse ne nuk ngulim këmbë atëherë kemi rënë pre e lojërave të Serbisë që ta minojnë sovranitetin e Kosovës e njëkohësisht të bëjnë trysni te ndërkombëtarët lidhur me këtë situate duke proklamuar me protesta se po kufizohet liria e individit.”, tha Ibishi.
Ndërkohë, veç forcave ushtarake të Serbisë, edhe shumë forca të rënda të Njësive Speciale të Kosovës kanë shkuar si përforcim për të mbajtur nën kontrollë situatën aktuale në veri të vendit.
