Kryeministri Edi Rama u ndal në Kuvend edhe tek Ballkani i Hapur. Në këtë pikë, Rama theksoi se “me qeverinë e Kosovës duam të bashkëpunojmë, ta trajtojmë këtë me shumë respekt”, por ai theksoi se “Shqipërisë nuk mund t’i jepen leksione dhe vendimet sovrane të Shqipërisë nuk mund të diskutohen asgjëkundi.
“…foshnjat që lindën në atë luftë dhe që sot po bëhen pak nga pak djem dhe vajza për t’u martuar, nuk ia kanë borxh politikës që luan luftash me Serbinë, as në Prishtinë as në tiranë. Nuk e kanë borxh që Kosova e nxitur edhe nga Tirana që kanë të bëjnë vetëm me luftën elektorale këtu e atje, të humbasë në kohë paqe, të gjitha kreditet ndërkombëtare që janë fituar me gjak e dhimbje, por natyrisht për Kosovën ne mund të flasin dhe u takon autoriteteve atje që marrin vendim, ndërsa ne na takon t’i respektojnë. Ama e njëjta gjë vjen dhe anasjelltas, nëse nuk na pëlqejnë vendimet e njëri-tjetrit bujrum t’i diskutojmë, por kurrsesi t’i shpallim si tradhtarë, ata që mendojnë ndryshe, duke luajtur me dhimbjet e njerëzve të përvëluar nga lufta, por edhe më padijen e atyre që pushkët i nxjerrin vetëm në ekran dhe në fb”.
Kryeministri ripërsëriti se Ballkani i hapur është pjellë e procesit të Berlinit.
“Ballkani i hapur është një pjellë e Procesit të Berlinit si nevojë për të ecur më shpejt për lirinë e lëvizjes së njerëzve e tij, pa pritur që të na mbledhin një herë në vit e në fund për të mos u bërë asgjë. Në procesin e Berlinit ishte edhe korridori blu, ku është. Ballkani i hapur nuk merr përsipër asgjë, që nuk është brenda kornizës së Procesit të Berlinit, por thjeshtë mundëson që ta nxjerrim vetë gomarin nga balta”.
Rama theksoi se destinacion final është Europa e bashkuar.
“Ballkani i hapur është një mekanizëm më shumë për ta përshpejtuar ndërtimin e hapësirave në integrimin europiane në shtete tona. Destinacioni ynë është realiteti i Europës së bashkuar, jo fantazinë e atyre që u ka ngelur ora. Ballkani i hapur është i njerëzve që nuk duan të presin me orë në kufi, është i fermerëve, fermerët shqiptar që janë sot eksportuesit më të mëdhenj në rajon. Shkoni pyesni fermerët,” tha ai përcjell tvklan.al
“Unë dua që me qeverinë e Kosovës të bashkëpunojmë, ta trajtojmë këtë me shumë respekt. Shqipërisë nuk mund t’i jepen leksione dhe vendimet sovrane të Shqipërisë nuk mund të diskutohen asgjëkundi. Koha do ta tregojë më shpejt se vonë se kush ka të drejtë”, theksoi Rama në fjalën e tij.
