Kryetari i delegacionit të Kosovës në bisedime për çështje e personave të zhdukur, Andin Hoti i cili në mandatin e kaluar ishte pjesë Partisë Demokratike të Kosovës , është larguar përfundimisht nga kjo parti.
Këtë e ka bërë të ditur në emisionin A23 me Flaka Vitakun, anëtari i kryesisë së PDK-së, Adri Nurellari.
I pyetur për përkrahjen që Hoti i ka dhënë Kurtit rreth çështjes së arkivave, Nurellari u shpreh se nuk i vije çudi që kur një person largohet nga partia t’i ndërrojë edhe qëndrimet për një post.
“Po njerëzit që marrin poste, pastaj në këmbim të posteve që marrin e ndryshojnë edhe besnikërinë e tyre. Nuk është rasti i parë që dikush largohet nga PDK-ja dhe shkon i bashkohet një partie tjetër, i ndërron qëndrimet dhe pozicionet,” tha ai.
Tutje Nurellari e ka përsëritur qëndrimin e PDK-së rreth pretendimeve për ekzistencën e arkivave të UÇK-së duke shtuar se kushdo që thotë se ato ekzistojnë, e dëmton Kosovën dhe se është qëndrim i papërgjegjshëm.
