Kreu i PSD-së, Dardan Molliqaj ka thënë se pusheti “Krejt dhe Drejt” është duke vazhduar fuksionin sipas motos “Propagandë dhe koncesione”, përcjell InLajmi.
Sipas Molliqaj Kurti shkon në Bruksel dhe flet për Serbinë si pushtuese shekullore, kurse Besnik Bislimi e fut brenda të njëjtës fjali UÇK-në dhe ushtrinë e Serbisë.
Ai gjithashtu ka thënë se empiricisti Bislim edhe mund të mos e kuptojë, por frikacaku Albin e din mirë se kur e pranon paritetin ke barazuar palët.
I pari i PSD-së ka thënë se një ushtri pushtuese dhe një çlirimtare dallojnë për nga natyra e tyre, jo thjesht për nga armatimi.
Postimi i plotë i tij:
Empiricisti Blisim dhe frikacaku Albin.
Pushteti “Krejt dhe Drejt” po e vazhdon funksionimin sipas motos: “Propagandë dhe koncesione”. Kurti shkon në Bruksel dhe flet për Serbinë si pushtuese shekullore, kurse Besnik Bislimi e fut brenda të njëjtës fjali UÇK-në dhe ushtrinë e Serbisë.
UÇK dhe makineria ushtarake e policore e Serbisë janë bërë palë të njëjta në një konflikt që dreqi e di si ndodhi e pse ndodhi. Sikur po flasim për ndonjë ishull ku janë ndeshur dy ushtri kolonizatore…
UÇK në njërën anë, ushtria,policia e paramilitarët e Millosheviqit në tjetrën. Empiricisti Bislim edhe mund të mos e kuptojë, por frikacaku Albin e din mirë se kur e pranon paritetin ke barazuar palët. Nuk ka paritet as ekuivalencë, ka asimetri e heterogjenitet.
Nuk është vonë kurrë për të kujtuar. Një ushtri pushtuese dhe një çlirimtare dallojnë për nga natyra e tyre, jo thjesht për nga armatimi. Ushtria pushtuese është heteronome sepse udhëhiqet nga një instancë shtetërore (e jashtme) komanduese që ruan pushtimin. Heteronom je kur s’ke autenticitet dhe ka instancë jashtë vetes që të mëson e komandon. Heteronom, prandaj instrument i interesave. Autonom (vetëvendosës) je kur udhëhiqesh nga vullneti yt dhe kështu je bashkësi politike përpara se të jesh pjesë e çfarëdo linje komanduese. Çlirimtarët janë gjithmonë kështu. Çlirimi është vetëreferencial, pushtimi e ka Tjetrin. Ky dallim është universal. Kjo është e vërteta jonë. /InLajmi/
