Kryeministri i Kosovës, Albin Kurti, ka publikuar një videomesazh duke u shprehur ngushëllime të gjithë familjarëve të të vdekurve nga koronavirusi, përcjell InLajmi.
Kurti poashtu ka falenderuar gjithë stafin shëndetësor, policët dhe inspektorët për punën që po bëjnë.
“Falënderim e mirënjohje infermierëve dhe mjekëve, policëve dhe inspektorëve, për këto mbi 500 ditë pune e beteje vetëmohuese”.
Kurti shtoi se duke parë situatën tani mund të mendohet se në muajt Qershor dhe Korrik Qeveria mund të bëntë më shumë, po ai tha se atëherë gjendja ishte shumë ndryshe.
“Po të merrnim masa ekstreme të kufizimit kur numrat ishin tejet të ulët, do të ishte mbi e tej reagim. Edhe atëherë, edhe sot, ne kemi vepruar në përputhje me rekomandimet e IKSHPK-së dhe me situatën në terren ku numri i rasteve të reja ishte shumë i ulët deri në fillim të muajit Gusht e madje gjatë tërë 10 ditëshit të parë”, ka thënë Kurti në videomesazh.
Kryeministri shtoi se rritja e infeksioneve dhe vdekjeve për këtë kohë, ishte e befasishme dhe e paparashikueshme.
“Ekspertët e prisnin një valë të varianti delta, por jo aq herët e as me rritje aq të shpejtë. Ne morëm masa, dhe po veprojmë në kohë reale”.
Kurti tha se Qeveria e merr përgjegjësinë si çdo herë dhe janë në krye të detyrës me përkushtimin më të madh.
“Sot është dita kur numri i dozave të administruara të vaksinës arrin shifrën prej një milion. 2/3 e këtyre janë për ata që kanë marrë së paku një dozë, kurse 1/3 për ata me 2 doza. Ka mjaftueshëm doza në stoqe dhe vaksinat tona janë të gjitha të regjistruara në EMA dhe FDA”./InLajmi/
