Në një konferencë të mbajtur për media ministri i Bujqësisë Faton Peci, ka bërë shpalljen e Programit të Pagesave Direkte për fermerët në vlerë prej 50 milionë euro, për vitin 2021, raporton InLajmi.
Peci tregoi se në fillimet e marrjes së detyrës, e ka gjetur këtë ministri me 40 milionë euro obligime ndaj fermerëve, por kjo gjë nuk I ka ndalur që të shpallim edhe këtë vit mbështetje për ta.
“Ministria e Bujqësisë Pylltarisë dhe Zhvillimit Rural është ballafaquar me 40 milionë euro obligime ndaj fermerëve e përkundër kësaj, kemi krijuar kushte për shpalljen e programit. I ftoj të gjithë fermerët që të aplikojnë nga dita e mërkurë kur edhe do të hyjnë në fuqi Udhëzimi Administrativ për Programin e Pagesave Ditekte për vitin 2021”.
“Programi në fjalë e rrit shifrën në 50 milionë euro vetëm për këtë vit fiskal, e që është përkrahja më e madhe ndonjëherë për fermerët. Risi tjetër e programit është edhe mbulimi i Primës së Sigurimit në vlerën prej 75%”.
“Për programin e Pagesave Direkte për vitin 2021 kemi në dispozicion vlerën prej 21 milionë euro. Për secilin vreshtarë mbështetja do të ketë 1 mijë euro për hektarë në 100 hektarë”.
Peci tha se shifra prej 50 milionë euro është mbështetja më e madhe ndonjëherë dhënë fermerëve./InLajmi/
