Prokuroria Themelore në Prishtinë ka njoftuar se ka arrestuar 2 persona në Podujevë, përcjell InLajmi.
Në njoftimin e Prokurorisë thuhet se të dyshuarit janë kapur në flagrancë, ndërsa po lëshonin teste negative të koronavirusit, në një laborator privat.
Njoftimi i plotë i Prokurorisë Themelore në Prishtinë:
Prishtinë, 4 shtator 2021– Prokuroria Themelore në Prishtinë, Departamenti i Përgjithshëm, ju njofton se me aktvendim të Prokurorit të Shtetit, janë ndaluar në kohëzgjatje prej 48 orësh dy (2) persona, pasi dyshohen se kanë kryer veprën penale “Falsifikimi i dokumenteve”, nga neni 390 të Kodit Penal të Republikës së Kosovës.
Në këtë çështje penale, prokurori i rastit ka urdhëruar masat teknike të hetimit dhe vëzhgimit dhe gjatë zbatimit të tyre janë siguruar prova për të cilat dyshohet se të njëjtit kanë kryer veprën penale të lartcekur, ashtu që në koordinim të plotë me Policinë e Kosovës, janë zënë në flagrancë dy të dyshuarit në një laborator privat në Podujevë, duke lëshuar teste me rezultate negative të Covid-19.
Të dyshuarit e lartcekur ndodhen nën masën e ndalimit 48 orësh./InLajmi/
