Lëvizja “FOL” ka mbajtur konferencë për media, ku është publikuar raporti “(Mos) zbatimi i Ligjit për Deklarim të Pasurisë nga Qeveria Haradinaj, Kurti 1 dhe Hoti”, raporton InLajmi.
Drejtoresha e kësaj lëvizje, Mexhide Dumolli është shprehur se viti 2020 është karakterizuar me ndërrim të qeverive gjë që ka shërbyer si një sfidë për deklarimin e pasurisë nga zyrtarët.
Ajo shtoi se sipas të dhënave, Agjencia për deklarim të pasurisë, ka dështuar pasiqë është një numër i madh zyrtarësh që nuk kanë bërë deklarimin sipas ligjit.
“Të gjithë jemi dëshmitar se viti 2020 është karakterizuar me ndërrim të tri qeverive dhe kjo ka bërë sfidë për deklarimin e pasurisë, jo të gjithë ministrat, kryeministrat kanë respektuar ligjin për deklarimin e pasurisë brenda periudhë së paraparë kohore”.
“Ne kemi hulumtuar, dhe ajo se çfarë mund të themi Agjencia ka dështuar pasi që kemi numër të madh të atyre që nuk e kanë deklaruar se siç ka kërkuar Ligji”.
Ndërsa, Albana Hasani hulumtuese në “FOL” , u shpreh se Qeveria Haradinaj, Hoti e Kurti 1 nuk kanë respektuar afatet ligjore për deklarimin e pasurisë.
“Nga 131 ministra e zv.ministra në qeverinë Haradinaj vetëm 61 prej tyre e kanë deklaruar pasurinë, në Qeverinë Kurti 1 nga 45 ministra dhe zv.ministra vetëm 21 prej tyre nuk e kanë deklaruar ndërsa në atë Hoti nga 77 prej tyre vetëm 32 e kanë deklaruar pasurinë”.
“Deklarimi i pasurisë përveç rritjes së transparencës ka efekt të madh në forcimin e besimit të publikut te institucionet shtetërore. Nga të gjeturat kryesore të raportit nga ministrat dhe zv.ministrat nga 131 ministra e zv.ministra të Qeverisë Haradinaj vetëm 61 prej tyre kanë respektuar afatin për deklarimin e pasurisë mirëpo me rastin e shkarkimit asnjëherë prej tyre se ka deklaruar”.
“Nga 45 ministrat dhe zv.ministrat në Qeverinë Kurti 1 vetëm 21 prej tyre e kanë deklaruar dhe 15 prej tyre e kanë bërë deklarimin pas dorëzimit të detyrës, nga 77 ministra dhe zv.ministra në Qeverinë Hoti vetëm 32 prej tyre e kanë deklaruar pasurinë me rastin e emërimit dhe asnjë prej tyre nuk e ka bërë deklarimin me rastin e dorëzimit të detyrës”./InLajmi/
