Talebanët po u bëjnë thirrje njerëzve afganë të qëndrojnë dhe të rindërtojnë vendin e tyre, por nuk do të pengojnë rrugën e atyre që duan të largohen, nëse kanë dokumentacionin e duhur, transmeton InLajmi.
Zëdhënësi taleban, Suhail Shaheen tha se njerëzit ende mund të largohen me fluturime komerciale pas afatit për largimin e trupave të huaja që është 31 Gushti.
Ai tha për BBC: “Ne nuk do vëmë pengesa në rrugën e tyre nëse kanë dokumentet e lëshuara, ata mund të shkojnë në fluturime komerciale në çdo kohë. Ne duam që ata të qëndrojnë në vend, por nëse kanë ndërmend të shkojnë, ata munden … nëse i kanë dokumentet e duhura ”.
Por ai theksoi se do të kishte “pasoja” nëse forcat e huaja do të qëndrojnë në vend përtej 31 Gushtit. Ai nuk shtjelloi në detaje se për çfarë pasoja po fliste, duke thënë se është udhëheqja talebanë që do të vendosë.
Ndërkohë, anëtarët e G7 do të takohen nesër për të diskutuar nëse do të zgjasin afatin e 31 Gushtit, në një kohë me skena kaotike në aeroportin e Kabulit./InLajmi/
