Ministrja e Drejtësisë, Albulena Haxhiu, ka reaguar ndaj sulmit dhe vrasjes së 18-vjeçares në Ferizaj, përcjell InLajmi.
Haxhiu përmes një postimi në Facebook, ka shprehur shqetësimin e saj për këtë rast, duke thënë se dhuna në këto përmasa është një alarm që duhet të mobilizojë institucionet e policisë, prokurorisë e gjykatave.
Ajo ka kërkuar që këto raste të trajtohen me prioritet, ndërsa dhunuesit të vendosen para drejtësisë.
Postimi i plotë i saj:
Dje nga mediat mësuam se një tjetër dhunim ndaj një gruaje të re 18 vjeçare ka përfunduar me fatalitet.
Dhuna e këtyre përmasave është alarm që duhet të mobilizojë institucionet e policisë, prokurorisë dhe gjykatave, t’i trajtojnë me prioritet e me seriozitetin maksimal rastet e tilla, kurse dhunuesit të vihen përballë drejtësisë.
Inkurajimit të qytetarëve për të raportuar dhunën, duhet t’i përgjigjemi me veprime konkrete, në gjetjen e dhunuesve dhe sjelljen e tyre përpara drejtësisë.
Është e domosdoshme të veprojmë, pa vonesa, e me përkushtim maksimal.
Cenimi i lirisë, qoftë përmes ngacmimeve seksuale, shantazheve e deri te dhuna ndaj grave apo kujtdo tjetër, është e papranueshme dhe si e tillë duhet të trajtohet, pa kompromis ndaj dhunës, e me dënimin e merituar ndaj dhunuesve.
Ky fenomen duhet të luftohet pareshtur. Dhuna nuk mund të normalizohet, si rrjedhojë duhet të dënohet ashpër./InLajmi/
