Kryetari i Aleancës për Ardhmërinë e Kosovës, Ramush Haradinaj, ka drejtuar kritika ndaj Qeverisë së Kosovës, në lidhje me menaxhimin e pandemisë së koronavirusit, raporton InLajmi.
Haradinaj ka mbajtur një konferencë për media, ku u shpreh se gjendja është shumë serioze, duke shprehur shqetësim për rritjen e shifrave të të infektuarëve në ditët e fundit.
Ai ndër të tjera shtoi se Qeveria po shpërfillë këtë situatë, ashtu siç ka shpërfillur kandidaturën e ministrit të Shëndetësisë për kryetar të Prishtinës.
Haradinaj i bëri thirrje Kurtit se nëse kjo është mënyra e menaxhimit të situatës nga ai, është më mirë të japë dorëheqje.
“Jemi para jush që të shprehim shqetësimin për rritjen enorme të numrit të infektuarve me virus dhe shifrat janë alarmante dhe janë më të mëdhatë që nga Marsi i vitit 2020, pra jemi duke shprehur shqetësimin tonë në mënyrën se si po menaxhohet sfida ose rreziku më i madh, për shëndetin e të gjithë globit realisht, njëkohësisht jemi për me i shpreh mos pajtimet tona se si qeveria po e menaxhon pandeminë. Vendet e rajonit janë treguar më serioze në vaksinimin, në Kosovë jemi diku rreth 12% rreth 13% dhe me qëndrua neutral për neve nuk është e pranueshme, dhe ne i kemi disa kërkesa për qeverinë. Qeveria të fokusohet në vaksinim dhe ta trajtojë gjendjen si emergjente dhe mos ta shpërfillë gjendjen siç e ka shpërfille deri tash me kandidaturën e Ministrit të Shëndetësisë, është legjitime kërkesa për dorëheqjen e Vitisë por faji nuk është të ai por të shefi i tij. Apeloj të Kurti se nëse ky është kualiteti se si ai do të përballet me sfidat më mirë është më dhënë dorëheqje sot”.
Haradinaj po ashtu, ka kërkuar rritjen e kapacitetit për vaksinim, duke kërkuar që kjo situatë të merret me më shumë seriozitet.
Ndërsa, në këtë konferencë ka folur edhe deputeti Shemsedin Dresha, i cili u shpreh se si AAK i rekomandojnë qeverisë që të përshpejtojë procesin e vaksinimit si dhe ti kthejë në punë 600 infermierët e larguar më parë.
“Ta përshpejtojë vaksinimin, të shpëtojë jetë, i rekomandojmë themelimin e një shtabi emergjent për menaxhimin e pandemisë dhe i rekomandojmë kthimin në punë të 600 infermierëve që i largojë nga puna, dhe që shëndetësinë ta konsideroj prioritet”./InLajmi/
