Drita ka fituar me rikthim 2-1 në shtëpi ndaj Feronikelit në ndeshjen e javës së parë të sezonit 2021/22 në Superligën e Kosovës.
Nën-kampioni i Kosovës e ka nisur me fitore sezonin e ri, pasi ka marrë tri pikë shumë të vlefshme në një ndeshje të fortë ndaj Feronikelit.
Pjesa e parë e ndeshjes u karakterizua me lojë më të mirë të vendasve, por edhe mysafirët patën rastet e veta dhe gjeten golin e vetëm në këtë pjesë.
Goli i vetëm në këtë pjesë erdhi në minutën e 44-të dhe ishte Sokol Kiqina, i cili shënoi për 1-0 dhe dërgoi ekipin e tij në pushim me epërsi.
Në pjesën e 2-të, Drita hyri me disa ndryshime, shtoi tentimet dhe në fund edhe i gjeti 2 gola duke e marrë një fitore të madhe me rikthim.
Ishte sulmuesi i ri Ardit Tahiri, i cili u inkuadrua në minutën e 67-të dhe shënoi 2 gola brenda 12 minutave për t’ia siguruar fitoren Dritës.
Tahiri shënoi në minutën e 77-të për 1-1, ndërsa në minutën e 80-të shënoi për 2-1 dhe ky doli të ishte rezultati përfundimtar, shkruan Telegrafi.
Në ndeshjen e radhës, Drita e pret Llapin, ndërsa Nikli është nikoqir i Gjilanit.
