3 ilaçe të reja janë duke u testuar në fazën e fundit të provave klinike të Solidaritetit global për të gjetur trajtime efektive kundër koronavirusit, ka njoftuar Organizata Botërore e Shëndetit, transmeton InLajmi.
Ilaçet, artesunate, imatinib dhe infliximab, do të testohen në pacientët e shtruar në spital me koronavirus në 52 vende të përfshira në programin Solidarity PLUS.
Duke folur në një konference për shtyp në Gjenevë, shefi i agjencisë Tedros Adhanom Ghebreyesus tregoi nevojën kritike për të gjetur terapi më efektive dhe të arritshme kundër koronavirusit.
“Ne tashmë kemi shumë mjete për të parandaluar, testuar dhe trajtuar COVID-19, përfshirë oksigjenin, deksametazonin dhe bllokuesit IL-6. Por ne kemi nevojë për më shumë, për pacientët në të gjitha skajet e spektrit klinik, nga sëmundje të lehta në të rënda. Dhe ne kemi nevojë për punonjës shëndetësorë të trajnuar për t’i përdorur ata në një mjedis të sigurt, ” u shpreh ai.
Të 3 ilaçet e reja u përzgjodhën nga një panel i pavarur për potencialin e tyre në zvogëlimin e rrezikut të vdekjes tek personat e shtruar në spital me koronavirus.
Këto ilaçe janë përdorur për të trajtuar sëmundje të tjera.
Artesunate është një ilaç për malarjen e rëndë, imatinib përdoret për kancere të caktuara, përfshirë leukeminë, ndërsa infliximab përdoret për trajtimin e Sëmundjeve të Crohn, artritit reumatoid dhe sëmundjeve të tjera të sistemit imunitar.
Ilaçet për provë kundër koronavirusit janë dhuruar nga prodhuesit Ipca, Novartis dhe Johnson & Johnson./InLajmi/
