Për të nderuar veprimtarinë e politologut, gazetarit e analistit politik Ramush Tahiri, pas vdekjes së tij, në Teatrin “Adriana” në Ferizaj u mbajt mbledhje komemorative, raporton InLajmi.
Në këtë përkujtim ka folur edhe kryetari i Komunës së Ferizajt, Agim Aliu, i cili u shpreh se Tahiri ishte intelektual i papërsëritshëm, duke e quajtur atë mik të çmuar.
“Miku im Ramush, kjo sallë është e heshtur dhe e mbushur me pikëllim për ty, shpejtë na e dhe lamtumirën, të kisha mik e gjithmonë të çmova si më të shtrenjtin ferizajas”.
Ndërsa, gazetari Nehat Islami tha se argumenti për Ramush Tahirin ishte mbështetja kur fliste për proceset politike, duke thënë se ai u shkollua për të bërë ndryshime në sistemin komunist.
“Ramushi nuk shkoi për studime në Zagreb që të bëhej sekretar diku. Ai shkoi të shkollohej për të bërë ndryshimet ndaj sistemit komunist”.
Akademiku Ali Aliu u shpreh se vendi dhe shoqëria mbetën pa një njeri të mirë.
“E lehtë i qoftë toka e Kosovës që e deshi shumë”.
Ndërsa, ish-ambasadori Avni Spahiu tha se vdekja e Tahirit është ditë pikëllimi për tërë Kosovën.
“Ramushi ishte personalitet me kontribut të madh intelektual, i cili e vuri veten në shërbim të kauzës kombëtare. Ishte veprimtar dhe kontribus shumë dimensional dhe nga më të shquarit”.
Djali i Ramush Tahirit, Kreshniku foli duke thënë se po ndihet krenar e fatlum pavarësisht dhimbjes për humbjen e babait.
“Një ndër vetitë e tij ishte që të mos e përziejë jetën personale dhe atë profesionale, duke mos sjellë problemet e punës në shtëpi”.
“Për mua dhe Valdrinin ishte baba, hati afër perfeksionit, kemi mësuar shumë nga ai por kanë mbetur edhe shumë gjëra që duhet t’i mësojmë”.
Varrimi i Ramush Tahirit bëhet në orën 14:00 në fshatin Dremjak të Ferizajt./InLajmi/
