Është votuar nga qeveria Projekligji për Ratifikimin e Marrëveshjes së Financimit “Projekti Emergjent i Kosovës për Covid-19”, Financim shtesë në mes të Republikës së Kosovës dhe Asociacionit Ndërkombëtar për Zhvillim (MFPT), raporton InLajmi.
Për këtë bashkëpunim që kap shumën e 15 milionë eurove, ka dhënë detaje ministri i Punës, Financave dhe Transfereve, Hekuran Murati.
“15 milionë euro është marrëveshja e cila përfshin ndihmën e vaksinave dhe pjesa tjetër edhe për barna esenciale mbi Covid-19, dhe është shumë me rëndësi”, tha Murati.
Qeveria poashtu votoi pro shqyrtimit të Draftit të Planit të veprimit për zbatimin e fazës së 2-të të prioriteteve politike të dakorduara ndërmjet Bashkimit Evropian dhe Republikës së Kosovës-Agjendës për Reforma Evropiane.
Zëvendëskryeministri Besnik Bislimi, u shpreh se janë disa shtylla që si bazë kanë rimëkëmbjen ekonomike, fuqizimi i arsimit, punësimi i grave, ekonomia etj./InLajmi/
