Hera e fundit që Fadil Muqolli i ka parë 4 fëmijët e tij ishte 17 prilli i vitit 1999. Së bashku me nënën e tyre dhe anëtarë të tjerë të familjes, 4 fëmijët e Fadilit u vranë nga forcat serbe në Poklek të Vjetër në Drenas.
22 vjet më parë në shtëpinë e familjes Muqolli, u vranë 54 njerëz. Shumica prej tyre ishin gra dhe fëmijë.
“Vajza ka qenë 13 vjeçe, djali i madh 12, djali i 2-të 10 vjeç dhe i 3-ti 9”, tregon Fadil Muqolli.
Fletore dhe libra të fëmijëve të vrarë gjatë luftës të paraqitura në ekspozitën, “Na Ishte Njëherë Që Kurrë Mos Qoftë”.
Muqolli, tash 53-vjeçar, tregon se në mesin e anëtarëve të tjerë të vrarë, ishte më e vogla e familjes, Liria, që ishte ende foshnje.
“Ndër këta 54 njerëz kanë qenë 24 fëmijë. Të vrarë janë 14 anëtarë të familjes time. Babai, nëna, katër motra, bashkëshortja me 4 fëmijë (një vajzë dhe tre djem), gruaja e vëllait me 2 vajza. Vajza e vogël e vëllait ka lindur në luftë, Liri e ka pas emrin dhe ka qenë 6 muajshe”, thotë Muqolli.
Presidentja e Kosovës, Vjosa Osmani e ka quajtur masakrën e Poklekut Holokausti i Kosovës.
Mirëpo sipas Fadil Muqollit, institucionet e Kosovës nuk kanë bërë asgjë për të dënuar fajtorët e kësaj masakre.
“E di që është ngritur një padi në Beograd në vitin 2015. Askush prej institucioneve, as të EULEX-it, as të UNMIK-ut, as këto tonat asgjë s’kanë bërë”, thotë Muqolli në një bisedë për REL.
Gjatë viteve të luftës në Kosovë më 1998-99 dhe në muajt e parë pas mbarimit të luftës, u vranë 1.024 fëmijë dhe 109 konsiderohen të zhdukur.
Nga këta 1.133 fëmijë, 100 i përkasin komuniteteve të tjera si serbë, romë, ashkali, egjiptas, boshnjakë etj.
