Kandidati për kryetar të Komunës së Podujevës nga AAK, Besnik Tahiri ka kritikuar qeverisjen e kësaj komune, përcjell InLajmi.
Tahiri përmes një postimi në Facebook ka drejtuar kritikat e tij ndaj qeverisjes, lidhur me projektin e Hartës Zonale të saj.
Ai tha se ky projekt e lë Podujevën si një qytezë e jo si një qytet siç e meriton.
Postimi i plotë i tij:
Pushteti i ri me qasje të vjetra po e lë Podujevën qytezë e jo qytet siç e meriton
Projekt i Hartës Zonale i Komunës së Podujevës pa PËRFILLUR procedurat ka kaluar vlerësimin nga ministritë sektoriale.
Ky dokument e lë Podujevën qytezë dhe jo qytet siç e meriton dhe siç është njëri prej qyteteve më të madha në Kosovë me mbi 89 mijë banorë, me 633 metra katrorë dhe me një popullsi ku 57 për qind janë nën moshën 30 vjeç.
Që ta sqaroj edhe pak më shumë. Harta Zonale duhet të ketë harmoni të plotë me Planin Zhvillimor Komunal. E ky dokument i miratuar tash ka kontradikta, mangësi dhe dykuptimësi në raport me Planin Zhvillimor.
Është jo logjike dhe e pamundshme që të implementohet Harta Zonale 2020-2028 dhe t’i paraprijë Planit Zhvillimor Komunal 2016-2025.
Sepse Harta Zonale e lë Podujevën qytezë e jo qytet siç është në Planin Zhvillimor Komunal.
Këto dy dokumente duhet të jenë në harmoni sepse vështirë ndryshohen dhe prodhojnë pasoja të mëdha dhe për kohë të gjatë për qytetarët.
Harta Zonale duhet të projektojë një qytet atraktiv për të jetuar dhe për biznese e jo ta kthejë Podujevën në qytezë.
Pushteti i ri me qasje të vjetra, me veprime të ngutshme, duhet të ndalet dhe të mos degradojë edhe më shumë Podujevën./InLajmi/
