Komisioni për Buxhet ka miratuar Projektligji për ratifikimin e Amendamentit të Marrëveshjes të lidhur ndërmjet Qeverisë së Kosovës dhe asaj hungareze në lidhje me Programin Kornizë për bashkëpunim financiar, raporton InLajmi.
Nga kjo marrëveshje Kosova mund të marrë kredi deri në 62 milionë euro.
Ministri i Financave, Hekuran Murati ka bërë të ditur se janë bërë disa ndryshime në amandamentin e bashkëpunimit financiar të Qeverisë hungareze dhe asaj kosovare.
Ai ka treguar se shuma e kredisë që Hungaria ka ofruar për Kosovën është 62 milionë euro dhe është kërkuar që të zgjatet afati i kryerjes së pagesës.
“Ka disa ndryshime që janë kërkuar nga ministria hungareze. Dhe po e riprocedojmë edhe njëherë këtë amandament. Të gjithë hapat ligjor janë ndjekë për negocimin e Marrëveshjes. Bëhet fjalë për një kredi të butë që Qeveria Hungareze i ka ofruar Qeverisë së Kosovës. I vetmi ndryshim është që të zgjatet afati i pagimit të kredisë”, është shprehur Murati. /InLajmi/
