Ish-kryetari i Gjykatës Kushtetuese, Enver Hasani, e cilësoi si primitive marrëveshjen për paqe, të cilën kryeministri Kurti e prezantoi në Bruksel gjatë takimit me presidentin serb Aleksandër Vuçiq.
Sipas Hasanit, ky dokument përmban referenca të cilat në të drejtën ndërkombëtare kanë dalë nga përdorimi që nga viti 1945.
“Do t’i veçoja 2 dimensione të kësaj qasje; dimensioni i parë është juridik ndërkombëtar dhe dimensioni i 2 është dimensioni politik sa i përket rolit dhe rëndësisë së dialogut për Kosovën në këtë moment që po flasim. Dimensioni politik është se çdokush që merret me të drejtën ndërkombëtare dhe e njeh terminologjinë e të drejtës ndërkombëtare, atë tekst e merr si një tekst shumë primitiv, për shkak se përdorë terminologji që nuk i takon të drejtës ndërkombëtare në këtë stad të zhvillimit që është sot, në këtë shekull që jetojmë ne dhe që nga 1945 e tutje”, është shprehur ai.
“Kjo sepse marrëveshja e fundit që përdorë mos sulmim, mos agresion dhe ngjashëm është marrëveshja Molotov- Ribbentrop e ’39, dhe pas vitit ‘45 përdorimi i dhunës dhe forcës ka marrë dimension tjetër, lufta ka dalë jashtë ligjit dhe për pasojë asnjë marrëveshje e draftuar pas kësaj periudhe nuk përmban shprehje të tilla, por referenca që kanë të bëjë me ta zëmë stabilitetin ndërkombëtar, regjional, klauzola ekonomike, për kufij etj”, tha Hasani.
Ish-kryetari i Kushtetueses tha se propozimi për paqe i Kurtit nuk ka relevancë në marrëdhëniet mes shteteve dhe si i tillë nuk mund të merret seriozisht as nga ndërmjetësuesit e dialogut.
“Arsyeja e 2 është dispozitat e saj janë të draftuara si t’i bësh në nene këto që po shohim ne, si të thuash neni 1 Adriatik Kelmendi është i ulur këtu, neni 2 Enver Hasani këtu. Referenca e dokumenteve me përjashtim të 2-3 është ‘soft loë’ është e drejtë e butë që nuk ka relevancë në marrëdhëniet mes shteteve”.
“E 3 që është edhe më gabim se vetë titulli, të drejtat e njeriut dhe liritë e njeriut i fut në kategorinë e të drejtave që plotësohen me reciprocitet, kjo po ashtu me luftën e 2 botërore është mbyllë sepse është abuzuar, sistemi i lidhjes së kombeve e ka pasur përmes reciprocitetit dhe i ka lejuar bashkësitë etnike t’i mbrojnë”, tha ai në KlanKosova
“Sistemi i lidhjes së kombeve i mbrojtjes së të minoriteteve ka qenë i tillë, tash të drejtat dhe liritë e njeriut janë të drejta të rendit juridik ndërkombëtar që nuk varen prej reciprocitetit dhe reciprociteti është ide që është komprometuar dhe nuk pranohet në asnjë variant të marrëveshjes përfundimtare”, tha Hasani.
