Policia italiane ka arrestuar një nga dy vëllezërit, të dyshuar për vrasjen e një ish-menaxheri banke në pension gjatë një tentative grabitje mbrëmjen e të shtunës.
Siç raportojnë mediet vendase, në pranga ka rënë Paulin Meçaj 31-vjeç.
Giovanni Caramuscio, 69-vjeç, u qëllua me armë zjarri dhe u vra në Lequile në provincën e Leçes, ndërsa po tërhiqte para nga një ATM.
Ngjarja ndodhi në sy të gruas së tij që po e priste në makinë. Mësohet se viktima ka bërë rezistencë ndaj grabitësve dhe njëri prej tyre e qëlloi me pistoletë dy herë në gjoks.
Arma e përdorur në krim, një pistoletë Beretta, u gjet në shtëpinë e Meçaj gjatë kontrollit të policisë.
Dinamika e ngjarjes
69-vjeçari dhe bashkëshortja e tij kishin shkuar në Lequile për të takuar disa të afërm të tyre dhe ndërsa ktheheshin në shtëpi, viktima ndaloi në ATM e një dege të Bankës së Napolit për të tërhequr para.
Aty ai u gjet i rrethuar nga dy vëllezërit shqiptarë që më pas e vranë.
Në identifikimin e autorëve, policisë u erdhën në ndihmë pamjet e kamerave të sigurisë së bankës por edhe dëshmia e gruas së viktimës dhe pse dy grabitësit i kishin fytyrat të mbuluara me maska, përcjell OraNews.
Siç raportojnë mediet italiane, edhe vetë grabitësit kishin lënë më shumë se një gjurmë të dobishme për identifikimin e tyre gjatë arratisjes pas krimit.
