Ministri i Mbrojtjes, Armend Mehaj ka qëndruar sot në komunën e Deçanit, gjegjësisht në Qendrën Kryesore të Mjekësisë Familjare për të parë nga afër punën e stafit mjekësor të kësaj qendre dhe pacientët në trajtim, përcjell InLajmi.
Mehaj ka njoftuar përmes rrjeteve sociale se është takuar së bashku me drejtorin e Drejtorisë së Shëndetësisë, Musa Berisha dhe të gjithë stafin të QKMF-së në Deçan.
Ai ka njoftuar se ua ka shprehur vlerësimin e tij më të lartë për shërbimin vetëmohues të tyre në përmbushjen me përkushtimin dhe dinjitetin më të lartë, detyrën e shenjtë të mantelbardhit.
Mehaj tha po ashtu se ka marrë të gjitha masat, që të gjitha nevojat dhe kërkesat e adresuara nga Shtabi Emergjent i Komunës, të realizohen në kohën e duhur me të gjitha kapacitetet e FSK-së në dispozicion.
Postimi i plotë i tij:
Bashkëvendas të mi të dashur deçanas,
Qytetarë të dashur të vendit tim,
Edhe pse çdo çast jam i informuar me situatën, sot, isha në vizitë në Qendrën Kryesore të Mjekësisë Familjare në Deçan, për të parë nga afër punën e stafit mjekësor të kësaj qendre dhe pacientët në trajtim. Drejtorit të Drejtorisë së Shëndetësisë, Musa Berisha dhe të gjithë stafit të QKMF-së në Deçan i shpreha vlerësimin tim më të lartë për shërbimin vetëmohues të tyre në përmbushjen me përkushtimin dhe dinjitetin më të lartë, detyrën e shenjtë të mantelbardhit.
Gjatë tërë kohës pata në dorë librin “Lufta kundër vdekjes” të dhuruar nga vet autori, drejtori Musa Berisha, këtij burri me një jetë të tërë në shërbim të Lirisë së vendit tonë.
E “luftën” me këtë emergjencë, e fituan edhe ky ekip i mrekullueshëm, të cilët më njoftuan se gjendja është gati në normalitet dhe se qytetarët nuk kanë nevojë më të shqetësohen.
Unë kam marrë të gjitha masat, që të gjitha nevojat dhe kërkesat e adresuara nga Shtabi Emergjent i Komunës, të realizohen në kohën e duhur me të gjitha kapacitetet e FSK-së në dispozicion./InLajmi/
