Ministria e Punëve të Jashtme dhe Diasporës në Kosovë ka njoftuar se deri në tani nuk është raportuar për viktima apo të plagosur, me shtetësi kosovare, në zonat e përmbytura në disa shtete të Evropës, përcjell InLajmi.
Përmes një komunikatë për media, kjo Ministri ka thënë se nga informacionet e siguruara në Gjermani, Belgjikë, Holandë, Luksemburg dhe Zvicër, misionet diplomatike nuk kanë hasur në diçka të tillë.
“Nga raportet e misioneve të Kosovës në këto shtete, deri të premten në mesditë, është kontaktuar në 2 raste Ambasada e Kosovës në Berlin si dhe Konsullata e Përgjithshme në Dyseldorf, të cilat kanë arritur të asistojnë në 2 raste në identifikimin e një familjeje dhe një personi tjetër, të cilët kishin rezultuar të humbur në rajonet e prekura nga përmbytjet”, është thënë mes tjerash në njoftim.
Në të 2 rastet, Ministria ka thënë se thënë se ka qenë në kontakt me autoritetet shtetërore të Gjermanisë, dhe se personat e përfshirë janë në gjendje të mirë shëndetësore.
Ndryshe, numri i të vdekurve nga përmbytjet në pjesën perëndimore të Gjermanisë është rritur në mbi 100./InLajmi/
