Kryetari i Deçanit, Bashkim Ramosaj ka mbajtur një konferencë për media, ku ka folur për situatën në komunë pas helmimit në masë të qytetarëve, raporton InLajmi.
Ramosaj është shprehur se numri i të helmuarëve ka kaluar mbi 1.500, ndërsa ka njoftuar se edhe në Pejë janë lajmëruar mbi 80 raste të ngjashme, e po ashtu ka pasur klinika private që kanë pranuar pacientë me simptoma të njejta.
Ai po ashtu ka treguar se qyteti i Deçanit, ditën e djeshme ka pasur vëmendjen e instiucioneve shtetërore dhe ka pranuar ilaçe për trajtimin e këtij infeksioni.
“Edhe në Rajonin e Pejës janë referu mbi 80 raste, jo nga QKMF e jonë por që kanë kërku ndihmë. Ka edhe klinika private që kanë trajtu pacient të tillë. Dje kemi pasur vëmendjen e institucioneve të shtetit. Kemi marrë ilaçe për trajtimin e kësaj sëmundje nga MSH. Dje kemi shpallur gjendje emergjente. Deri më tani numri i pacienteve e ka kalu mbi 1500,“ është shprehur ai.
Kryetari ka rikonfirmuar se uji në aspektin biologjik është i pastër, por duhen bërë analiza më të thella për të gjetur shkakun e helmimit.
“Dje kemi marrë rezultatet e IKSHPK, uji në aspektin kimik dhe biologjik është i përdorshëm dhe i pastër por që duhet bërë analiza shtesë që të dihen arsyet pse erdhi ky helmim,” tha ai./InLajmi/
