Sindikata e punëtorëve të Administratës Tatimore të Kosovës pas mbajtjes së një greve, kanë prezantuar kërkesat e tyre, raporton InLajmi.
Punëtorët e ATK-së, për 3 orë ndërprenë të gjitha shërbimet për tatimpaguesit, ku pas përfundimit të kësaj greve, sekretarja e Sindikatës, Arlinda Bajra prezantoi 3 kërkesa kryesore të cilat edhe janë dërguar në ministri të Financave.
Bajra u shpreh se nga kërkesat e prezantuara më me urgjencë është krijimi i një ambient të përshtatshëm të punës.
“Ju kemi njoftuar edhe paraprakisht që sot kemi vazhduar grevën e pezulluar të muajit maj. Arsyet për këtë grevë janë bërë të ditura edhe paraprakisht. Për shkak të procedurave kemi dhënë një afat prej 30 ditësh për ministrinë për të shqyrtuar mundësinë e realizimit të kërkesave tona”.
“Kërkesat janë paraqit edhe përmes shkresave me shkrim që janë dërguar disa herë në ministri, ku kanë qenë krijimi i kushteve të punës, propozim ndryshimi i statusit të ATK-së dhe kompensimet tjera për zyrtarët”.
Ajo ka njoftuar se greva është mbajtur në të gjitha regjionet e ATK-së dhe është respektuar thuajse 100%.
“Greva ka filluar sot në ora 09:00 deri në ora 12:00, do të vazhdojë fillimisht kështu. Është mbajt në të gjitha regjionet e ATK-së dhe është respektuar pothuasje 100 për qind. Për ndryshimet tjera jemi në kontakt”./InLajmi/
