Kryetari i Komunës së Deçanit, Bashkim Ramosaj ka njoftuar se nga sot do të jetë në funksion ujësjellësi në këtë komunë, përcjell InLajmi.
Ramosaj përmes një postimi ka bërë të ditur se pas një takimi të mbajtur me Shtabin për Menaxhimin e Emergjencave dhe sipas rekomandimeve të IKSHPK-së nga sot do të jetë në funksion ujësjellësi.
Ai ka bërë lutje për qytetarët që ujit të përdoret vetëm për nevoja sanitare, ndërsa për amvisëri ka rekomanduar që fillimisht të vlohet.
Kujtojmë se mbi 1.500 njerëz janë të helmuar në Deçan dhe deri tani ka dyshime se shkak i helmimit mund të jetë uji.
Postimi i plotë i tij:
Të nderuar qytetarë të Deçanit
Në takimin e mbajtur sot me Shtabin për Menaxhimin e Emergjencave dhe sipas rekomandimeve të IKSHPK-së nga sot do të jetë në funksion ujësjellësi në Komunën e Deçanit.
Luten të gjithë qytetarët e Komunës së Deçanit të zbatojnë kriteret e poshtëshënuara për përdorimin e ujit:
1.Uji të shfrytëzohet vetëm për nevoja sanitare!
2.Uji për nevoja të amvisërisë rekomandohet të përdoret vetëm pasi të vlohet!
Këto kritere zbatohen deri në një vendim tjetër. BR/InLajmi/
