Presidentja Osmani, ka kërkuar nga institucionet përgjegjëse, angazhim për zbardhjen e shkaqeve që çuan në helmim të qytetarëve nga uji në Komunën e Deçanit, përcjell InLajmi.
Osmani reagoi përmes një shkrimi në Facebook, pas një bisede që zhvilloi me ministrin e Shëndetësisë, Arben Vitia dhe kryetarin e Komunës së Deçanit, Bashkim Ramosaj.
Presidentja kërkoi edhe një hetim me urgjencë nga organet e drejtësisë.
Postimi i plotë i saj:
Pas lajmit shqetësues për helmimin e një numri të madh të qytetarëve të komunës së Deçanit, kam biseduar me Ministrin e Shëndetësisë, Arben Vitia, si dhe kryetarin e komunës së Deçanit, Bashkim Ramosaj, të cilët më kanë njoftuar për gjendjen e qytetarëve të helmuar dhe masat që janë marrë nga niveli qendror dhe komunal për t’ju qëndruar pranë qytetarëve të prekur.
Pres nga të gjitha institucionet angazhim të mëtejmë e të plotë në ofrimin e trajtimit adekuat shëndetësor për qytetarët e helmuar, si dhe zbardhjen e shkaqeve që kanë çuar në helmimin e qytetarëve. Një hetim nga organet e drejtësisë është i domosdoshëm dhe duhet të trajtohet me urgjencë.
Qytetarëve të helmuar ju uroj shërim sa më parë dhe tejkalim të kësaj situate pa pasoja. Si Presidente e Republikës do të mbaj kontakte me të gjitha institucionet qendrore dhe komunale për t’u informuar lidhur me masat e ndërmarra për adresimin e këtij rasti shqetësues për shëndetin e qytetarëve tanë./InLajmi/
