Në seancën e sotme të Kuvendit të Kosovës është diskutuar mbi rekomandimin për shkarkim të Bordit të Radio Televizionit të Kosovës, raporton InLajmi.
Ky rekomandim është kundërshtuar nga partitë opozitare, ndërsa është mëbshtetur nga pozita.
Në emër të Lëvizjes Vetëvendosje, deputeti Armend Muja, ka thënë se kjo parti e mbështet rekomandimin e Komisionit për shkarkimin e Bordit, duke dhënë disa arsye.
“Në emër të VV-së dhe rekomandojmë dhe e mbështesim në tërësi rekomandimin e Komisionit funksional. Kjo për shkak të disa arsyeve.”
Ndërsa, nga PDK ka folur Bedri Hamza, i cili tha se është duke u krijuar një praktikë e keqe në Kuvend, duke u krijuar komisione hetimore që po shndërrojnë Kuvendin në Gjykatë.
“Është vendos një praktikë dhe një precedencë e keq. Komisionet e Kuvendit në Komision Funksionale dhe shumë prej tyre janë bërë edhe komisione hetimore dhe Kuvendi po shndërrohet në gjykatë”.
“Është totalisht e padrejtë dhe e papranueshme me thanë që një institucion si RTK-ja nuk ka pas auditim. Dallon kur auditimin e kryen Zyra Kombëtare e Auditimit dhe kur auditimi kryhet nga bashkëpunëtorë të jashtëm”.
Ndërsa, Agim Veliu nga LDK, u shpreh se kjo parti distancohet nga ndërhyrja në RTK.
“Kjo çfarë po ndodhë sot është një njollë e zezë për demokracinë tonë e për të cilin do të reagojnë edhe ndërkombëtarët. Kjo është kapje klasike e transmetuesit publik. LDK distancohet nga ndërhyrja në këtë institucion”.
Kurse, Besnik Tahiri nga AAK, këtë rekomandim e ka cilësuar si puro-politik.
“Sot kemi vendosur në rendin e ditës një pikë që rekomandon shkarkimin e Bordit të transmetuesit publik, që në rrethana normale nuk është dashur as të vie e as të trajtohej në këtë formë. Është mëse e vërtetë që raporti që ka ardhur nga RTK-ja nuk ka qenë raport i mirë”.
“Ka pasur ngecje dhe edhe mua si anëtar i komisionit nuk më ka pëlqyer. Ka një diskrepancë të madhe në mes të raportit që kemi marrë ne dhe të punës së mirë që bëhet në RTK. Ky shkarkim për mendimin tim është puro politik dhe i njëanshëm”./InLajmi/
