Shtëpia më e madhe e futbollit në Evropë, UEFA, i ka ftuar në finalen e madhe të Kampionatit Evropian në Wembley, mesfushorin danez Christian Eriksen, gruan e tij si dhe stafin mjekësor që e ndihmuan lojtarin në shpëtimin e jetës së tij, pas një sulmi kardiak që kishte në fushë në ndeshjen kundër Finlandës në hapje të “EURO 2020”.
Anise janë ftuar, Eriksen ende nuk e ka konfirmuar pjesëmarrjen në duelin final për më të mirin e Evropës në futboll
Njëri prej mjekëve që mori pjesë tha se ndihet i nderuar për ftesën.
“Unë jam i ngazëllyer, si një fëmijë në prag të Krishtlindjes. Jam shumë krenar për përpjekjet e mia, por edhe për të gjithë ekipin. Nuk ishte një punë e një njeriu”, tha Peder Ersgaard.
“Shpresoj të shoh Danimarkën kundër Italisë. Kjo do të ishte vërtet e madhe. Thjesht imagjinoni nëse ata bëhen kampionë të Evropës”, ka thënë Ersgaard për revistës Fagbladet FOA, përcjell Klan Kosova.
Pas kësaj ngjarje, Eriksen është duke u rikuperuar në shtëpi, ndërsa kombëtarja e tij tashmë ka arritur në gjysmëfinale e ku do të përballet kundër Anglisë.
