Ministria e Arsimit, Shkencës, Teknologjisë dhe Inovacionit, ka publikuar rezultatet e Provimit Shtetëror të Maturës, të cilit i janë nënshtruar mbi 23.000 nxënës të klasave të 12-ta në gjithë vendin, përcjell InLajmi.
Këtë vit, rezultati i përgjithshëm i kalueshmërisë është 68.43%. Prej këtij rezultati, 68.36% është kalueshmëria në mësimin në gjuhën shqipe, 69.47% në mësimin në gjuhën boshnjake dhe 74.77% është kalueshmëria në mësimin në gjuhën turke.
Rezultatet e Provimit Shtetëror të Maturës tashmë janë shpërndarë në shkolla.
Provimi i mbajtur më 26 qershor, është organizuar në 3 gjuhë: shqipe, boshnjake dhe turke dhe është mbajtur në 177 qendra të testimit.
Në këtë proces kanë qenë të angazhuar mbi 2000 administrues, 550 komisionerë, 360 mbikëqyrës dhe 200 vëzhgues. Po ashtu, të gjitha Qendrat e testimit janë monitoruar nga Këshilli Rinor Kosovar (KYC).
Ministria e Arsimit, Shkencës, Teknologjisë dhe Inovacionit njofton se për shkak të përdorimit të telefonit, nga provimi janë larguar gjithsej 69 nxënës, të cilëve u është anuluar testi.
MASHTI gjithashtu është duke i vlerësuar raportet e komisioneve në Qendrat e testimit dhe së shpejti do të publikohen emrat e administruesve të cilët nuk kanë realizuar detyrën më përgjegjësi dhe ndaj të njëjtëve do të merren masa ligjore.
MASHTI falënderon të gjithë të përfshirët në procesin e mbajtjes së Provimit Shtetëror të Maturës për kontributin dhe bashkëpunimin e tyre./InLajmi/
