Pas deklaratës së zëvendësministrit të Mjedisit, Planifikimit Hapësinor dhe Infrastrukturës, Hysen Durmishi, se ka dorëzuar në Prokurorinë Speciale kontratë të dyshimtë të nënshkruar nga Pal Lekaj, ka reaguar ky i fundit, përcjell InLajmi.
Sipas Durmishit, një kontratë e cila kishte vlerë të parashikuar 500.000 euro e më pas kishte përfunduar në vlerë 5 milionë e 300.000 euro, ishte nënshkruar nga Pal Lekaj.
Menjëherë pas kësaj deklarate me një postim në Facebook ka dalë Pal Lekaj, i cili ka mohuar të ketë nënshkruar një kontratë të tillë.
Lekaj deklaratat e Durmishit i ka cilësuar tendecioze dhe ka hedhur akuza ndaj tij dhe ministrit Liburn Aliu, duke thënë se janë ata të dy që kanë nënshkruar kontrata në vlerë afër 10 milionë euro, pa procedura prokurimi.
Postimi i plotë i tij:
Reagim ndaj lajmeve të publikuar në disa media se “Durmishi e dërgon në Prokurori Speciale Lekajn”.
Me lajmin e datës 2 Korrik 2021 i shpërndarë në disa media është shpallë një gënjeshtër në opinion me të vetmin qëllim për t’i mbuluar shkeljet dhe veprimet korruptive të 3 muajve të qeverisjes aktuale.
Nga unë, gjatë kohës kur kam qenë Ministër i Infrastrukturës, e them me bindje të plotë, dhe kjo do të dëshmohet shumë shpejtë, nuk kam nënshkruar asnjë kontratë të tillë siç është përshkruar në deklarimet e z. Durmishit.
Paraqitja e z. Durmishi dhe implikimi i im në deklarimet e tij, sikurse edhe raportimet dhe titujt e mediave janë tendencioze ndaj meje.
Ndërkohë që vetëm gjatë dy muajve të fundit Durmishi në Ministrinë që udhëheqë Liburn Aliu kanë nënshkruar afër 10 milion euro kontrata pa zhvilluar asnjë procedurë të prokurimit dhe të njëjtat nuk janë publikuar fare, duke kontrabanduar në zyrën e Durmishit vlera fiktive dhe të rrejshme.
Derisa në Ministrinë e Liburn Aliut është instaluar një anarki totale financiare dhe keqpërdorim i thellë i buxhetit, me të cilat keqpërdorime duhet te merren seriozisht organet, zëvendësi i tij Hysen Durmishi, një ditë pasi i dha tender 1 milion Euro ish-shefit të tij, del dhe përmend emrin tim në media pa asnjë argument, vetëm e vetëm për të shpërqendruar vëmendjen nga skandalet dhe aferat e tij korruptive.
Nuk është hera e parë që jam bërë pjesë e të tilla fushatave dhe persekutimeve të ashpra publike pa asnjë bazë argumentuese, por këto të pavërteta nuk më ndalin./InLajmi/
