Kurti kujton Deklaratën e 2 Korrikut, vlerëson guximin e nënshkruesëve të saj

Kryeministri i Kosovës, Albin Kurti, ka kujtuar nënshkrimin e Deklaratës Kushtetuese të 2 Korriku, përcjell InLajmi.

Kurti përmes një postimi në Facebook, ka shkruar për mbledhjen e 111 delegatëve në nënshkrimin e Deklaratës, duke e cilësuar këtë akt si një vepër të guximshme nga ana e tyre.

Në postimin e tij, ai përkujtoi edhe artistin e ndjerë Adem Mikullovcin, si deputet të 2 republikave të Kosovës, asaj të 2 Korrikut dhe 17 Shkurtit.

Postimi i plotë i tij:

Para 31 vitesh, nën rrethimin e hekurt të tankeve e autoblindave të regjimit të Serbisë, triumfoi vullneti i lirë qytetar mbi legalitetin shtypës të Serbisë.

Para dyerve të mbyllura të Kuvendit të Kosovës, 111 delegatë miratuan publikisht Deklaratën Kushtetuese, me të cilën Kosova u shpall njësi e pavarur, si pararendëse e Republikës së parë të Kosovës.

Nënshkrimi i kësaj deklarate, nga 114 delegatë, shprehte kërkesën e kombit shqiptar për liri dhe vetëvendosje politike në ish Jugosllavi.

Sot kujtojmë veprën e guximshme të delegatëve nënshkrues, që i mveshi ata me petkun e lavdisë së përjetshme.

Në këtë 2 korrik të parë pa të, kujtojmë atdhedashësin artist, Adem Mikullovci, deputet i të dy republikave të Kosovës: asaj të Deklaratës Kushtetuese të 2 korrikut 1990, dhe të 17 shkurtit 2008.

Shëmbëlltyra e tyre, udhërrefyes për ne./InLajmi/