Zvicra bëri mrekullinë, duke eliminuar Francën në fazën e 1/8-ave pas gjuajtjeve të 11-metërshave, ndërsa tani e pret një tjetër kundërshtar i fortë si Spanja, me të cilën do të përballet në çerekfinale.
Megjithatë fantazisti nga Gjilani, Xherdan Shaqiri është mjaft optimist edhe për përballjen me skuadrën e Luis Enriques, pasi siç thekson në konferencën për shtyp, helvetët kanë treguar se mund t’u shënojnë më shumë se një gol edhe skuadrave të mëdha.
“Ndaj Spanjës do të jetë një tjetër ndeshje e fortë, por ne besojmë në aftësitë tona. Përballë Francës treguam se ndaj skuadrave të mëdha mund të shënojmë më shumë se një gol, madje 3 të tillë, ndaj kjo na bën optimistë edhe për sfidën e ardhshme ndaj Spanjës”, deklaroi Shaqiri.
Futbollisti i Liverpoolit nuk arriti të japë assist apo të shënojë ndaj “gjelave”, megjithatë u shpreh se ishte mjaft i kënaqur me paraqitjen e tij dhe tha se performanca nuk matet vetëm me gola, përcjell EkonomiaOnline.
“Unë mundohem të bëj më të mirën dhe jam i kënaqur me atë që dhashë ndaj Francës, Natyrisht që nuk shënova, por performanca nuk matet vetëm me gola e asiste”, u shpreh Shaqiri.
