Është publikuar raporti i përvjetshëm, “Treguesit e nivelit të lirisë së mediave dhe sigurisë së gazetarëve – 2020”, nga Asociacioni i Gazetarëve të Kosovës, raporton InLajmi.
Kryetarja e Bordit të AGK-së Gentiana Begolli është shprehur se çdo vit po bëhet më e rëndë gazetaria në vend, duke u ndalur te atakimet ndaj gazetarëve, pagat e ulëta të tyre dhe oraret e stërzgjatura.
“Ajo çfarë është evidente se rastet e atakimeve ndaj gazetarëve nga viti në vit shtohen, klima e të bërit gazetari po shkon duke u rënduar dhe ballafaqohen me probleme të njëjta dhe paga shumë të ulëta”.
“Nëse flasim brenda mediumeve ku ata punojnë ballafaqohen me orare të stërngarkuara me nga një ditë pushim dhe mos të flasim me qasjen e redaktorëve. Te gazetarët është mbjellë frika se çfarë tema mund të trajtojnë”.
Ndërsa, drejtoresha ekzekutive e AGK-së Getoarbë Mulliqi, u shpreh se në vitin 2020 është rritur numri i sulmeve ndaj gazetarëve, ku nga 17 sulme në 2018, në vitin 2020 janë shënuar 24 raste.
“Në Kosovë media është nga sektorët që është goditur më së shumti. Nëse krahasojmë sulmet që janë bërë ndaj gazetarëve në vitin 2018 kemi pasur 17, në 2019 kemi 21 sulme ndërsa në vitin 2020 kemi 24 raste ka edhe raste të tjera që nuk janë raportuar, rastet më të rënda gjatë viti 2020 janë rastet e Shkumbin Kajtazit si dhe rasti i gazetarit Valon Syla”.
“AGK-ja luan rolin e sindikatës dhe duhet një sindikatë të përgjithshme dhe për momentin nga RTK, llojet e sulmeve të cilët janë përballë kolegët tanë mirëpo nuk qëndrojmë në top listën sepse Serbia është shteti i parë me më së shumti raste të raportuara”.
Edhe drejtori i Këshillit të Mediave të Shkruara, Imer Mushkolaj, u shpreh se është një numër shumë I vogël i mediave që kanë kod të etikës, duke kërkuar krijimin e një sindikate të gazetarëve në vend.
“Në Kosovë vetëm një numër vogël i mediave kanë kod të etikës. Kodi i etikës janë të rëndësishme për gazetarët dhe punën profesionale që bëjnë”.
“Gazetarët të kenë një rregullativ të plotë ligjore mënyrën se si funksionojnë ata, dy çështje që për mu janë specifike është ajo se del se gazetarët jo që kanë presione nga menaxherët por kanë vetë një lloj censure, një problem tjetër është droja e gazetarëve që të flasin në redaksi”./InLajmi/
