Nga Ministria e Shëndetësisë është njoftuar se në Kosovë janë konfirmuar dy raste me variantin Delta të koronavirusit, përcjell InLajmi.
MSH bën të ditur se nga 22 mostrat e dyshimta që ishin dërguar për identifikim në Berlin, 2 kanë dalë të infektuara me variantin Delta.
“Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 mostra me variantin Delta (B.1.617.2) të SARS-CoV-2. Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e IKSHPK-së tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve”, njofton MSH.
Ministria e Shëndetësisë, ka folur për këtë variant, duke thënë se Delta u detektua për herë të parë në Indi në dhjetor të vitit 2020, dhe duke e cilësuar si njërin prej varianteve më brengosës në rruzullin tokësor.
“Masat parandaluese janë të njëjta. Individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës”, thekson Ministria e Shëndetësisë./InLajmi/
