Është rishikuar sektori i pylltarisë në Kosovë, nga Ministria e Bujqësië, raporton InLajmi.
Ministri i Bujqësisë Faton Peci, është shprehur se pyjet janë pasuri e vendit dhe prioritet për ministrinë që ai drejton. Ai tha se qeveria ka marrë hapa të rëndësishëm që ky sektor të jetë prioritet.
“Pyjet mbulojnë gati gjysmën e Kosovës, andaj në aspektin ambiental dhe ekonomik paraqesin një proces strategjik. Ne në programin tonë kemi prioritet pikërisht këtë tematikë, dhe rrjedhimisht kjo krijon lirimin e vendeve të punës për ata persona që jetojnë në këto zona me pyje”.
“Ne si Qeveri kemi ndërmarrë hapa të rëndësishëm që korniza ligjore e këtij sektori të jetë një ndër prioritetet tona”, tha ai.
Më tej, ministri shtoi se këtë vit pritet që të aprovohet një ligj i ri që do të rrisë transparencën dhe ruajtjen e pyjeve.
“Ne këtë vit do aprovojmë ligjin e ri të pyjeve, i cili definon qartë ruajtjen e pyjeve dhe rregullon shfrytëzimin e produkteve dhe rritjen e transparencës”, theksoi tutje Peci.
Edhe, Ambasadorja e Suedisë në Kosovë, Karin Hernmarck tha se degradimi I pyjeve është një ndër sfidat e Kosovës, prandaj ky sektor duhet të jetë prioritet për Qeverinë.
“Kosova po përballet me sfida të mëdha të degradimit të ajrit, ujit e pyjeve dhe këto duhet të jenë synime dhe prioritete të qarta për Kosovën”.
“Pyjet janë me rëndësi strategjike për Kosovën ashtu siç janë edhe për Suedinë”, tha Hernmarck.
Ndërsa, Koordinatorja për zhvillim e OKB-së në Kosovë, Ulrika Richardson tha se pylltaria është një pasuri dhe resurs i çmuar që Kosova e posedon.
“Me zbutjen e situatës së Covidit, kemi problemin tjetër lidhur me natyrën, pylltaria nuk është vetëm një sektor dhe një vlerë shoqërore dhe ekonomike, ku shumë njerëz varen nga ky sektor dhe vlerë kulturore”, tha Richardson./InLajmi/
