“Dështoi Bashkimi Europian dhe jo Shqipëria apo Maqedonia e Veriut”. Këtë deklaroi nga Shkupi, kryeministri Edi Rama, një ditë pas vendimit të vendeve anëtare të BE për të mos caktuar datën për Konferencën e Parë Ndërqeveritare për të 2-ja vendet, për shkak të vetos së vendosur nga Bullgaria.
“Dështoi Bashkimi Europian dhe jo Shqipëria apo Maqedonia e Veriut. Ne jemi partner i rëndësishëm ekonomik me Maqedoninë e Veriut. Ne nuk kemi dështuar, ata kanë dështuar. Është shtëpia e tyre, ne duam të hyjmë në këtë shtëpi, ndaj dhe nuk vendosim ne. Ne jemi në Europë, jemi të rrethuar nga kufij europianë. E vetmja keqardhje që kam është se do të ishte më mirë të na thonë se; ‘ju duam brenda familjes, por janë disa rregulla që nuk janë ende gati’, pasi krijohet një situatë pak e çuditshme, pasi qytetarët në Shqipëri i besojnë këta zyrtarë evropianë, dhe mendojnë se është politika e brendshme problem”, ka thënë Rama.
Deklaratat, kryeministri Rama i ka bërë në forumin ekonomik në Shkup, i cili mbahet për herë të parë në Maqedoninë e Veriut.
Forumi bëri bashkë udhëheqësit politikë dhe komunitetin e biznesit nga rajoni dhe synon ndërtimin e bashkëpunimeve për zhvillimin e rajonit.
Kryeministri i Shqipërisë, Edi Rama dhe ai i Maqedonisë së Veriut, Zoran Zaev iu drejtuan pjesëmarrësve në forum, ku përveç komunitetit të biznesit marrin pjesë edhe ambasadorë nga vende të ndryshme, përcjell EuroNews Albania.
Korrespondenti i Euronews Albania në Shkup, Benjamin Arifi raportoi se kryeministri i RMV, Zoran Zaev në fjalimin hapës i ka njohur sipërmarrësit e pranishëm në forum me zonat e lira ekonomike dhe përparësitë e investimit në RMV.
