Policia e Kosovës në bashkëpunim dhe koordinim me Prokurorinë Shtetit, në vazhdën e angazhimeve në parandalimin dhe luftimin e veprave kriminale, konkretisht Drejtoria për Hetimin e Trafikimit me Narkotikë (DHTN),- njësia në Prishtinë, ka realizuar një operacion policor në rajonin e Prishtinës dhe të Gjilanit, i cili ka rezultuar me arrestimin e 6 personave të dyshuar, përcjell InLajmi.
Arrestimi i personave të dyshuar është bërë mbi dyshimin e bazuar për përfshirje në veprat penale “Blerja ,posedimi shitja dhe shpërndarja e paautorizuar e narkotikëve, substancave psikotrope ose analoge”, “Mbajtja nën kontroll dhe shfrytëzim i paautorizuar i armëve”, “Prodhimi dhe shpërndarja e produkteve të dëmshme mjekësore dhe pa banderolë” si dhe “Shmangia nga pagesat e detyrueshme doganore ose tarifave akcizore”.
Me urdhër të prokurorit kompetent është bërë edhe kontrollimi i katër lokacioneve, prej tyre 2 banesa të banimit, njëra në Prishtinë dhe tjetra në Fushë Kosovë, si dhe 2 shtëpi në Gjilan së bashku me një objekt përcjellës, të cilat dyshohet se grupi në fjalë i kanë përdorur për fshehje, shitje dhe shpërndarje të narkotikëve, si dhe për kontrabandë të barnave me origjinë të dyshimtë.
Gjatë realizimit të kontrollit në cilësi të provave materiale në lokacione të ndryshme janë gjetur të fshehura në vende dhe mjete të ndryshme, provat e sekuestruara:
- 82 kilogramë e 914 gramë marihuanë
- 100 paketime të barnave të kontrabanduara, me peshë prej 100 kilogramëve e 180 gramëve
- 1 pushkë gjuetie me 35 predha (fishekë) si dhe 2 qese najloni të mbushura me barot dhe sfera për municion të armës së gjuetisë.
- 1 armë e gjatë ‘AK- 47’ me 1 karikator.
- 1 revole ‘TT’ me një karikator dhe 6 predha (fishekë).
- 1 dylbi e armës së gjatë, 174 predha (fishekë).
- 5 vetura të ndryshme.
- 15.774,50 € si dhe 20 franga zvicerane.
- Barna të llojeve të ndryshme.
Personat e dyshuar janë arrestuar dhe me vendim të prokurorit kompetent janë dërguar në mbajtje për 48 orë./InLajmi/
