Vetëm brenda 2 javëve të fundit mbi 40.000 qytetarë nga diaspora kanë hyrë në Kosovë përmes Aeroportit Ndërkombëtarë të Prishtinës “Adem Jashari”, ka bërë të ditur, Valentina Gara, zëdhënëse në këtë institucion.
“Brenda këtyre dy javëve janë realizuar 287 fluturime. Prej tyre 41.662 udhëtarë kanë ardhur në Kosovë. Udhëtarët kryesisht kanë ardhur nga Gjermania dhe Zvicra”, thotë Gara.
Ky fluksi i madh i qytetarëve nga diaspora të cilët po arrijnë për pushime në Kosovë, sipas infekologut, Ilir Tolaj nuk paraqet ndonjë rrezik për rritjen e numrit të të infektuarve me koronavirus, pasi që ata kryesisht vijnë nga vendet që kanë një përqindje të lartë të qytetarëve të vaksinuar.
Shtetet e Bashkimit Evropian janë afër dhënies së një doze të vaksinës për pothuajse gjysmën e popullsisë, ndërsa 1/3 e popullsisë besohet se ka marrë të 2-ja dozat.
Qytetarët e Kosovës kryesisht jetojnë dhe punojnë në numër më të madh në Gjermani.
Sipas të dhënave të Ministrisë së Shëndetësisë në Gjermani dhe Instituti Robert Koch, mbi 50 % e popullsisë kanë marrë dozën e parë të vaksinës, ndërkaq 31.1 për qind dozën e 2-të.
Infektologu Ilir Tolaj, thotë se personat e vaksinuar dhe ata që e kanë kaluar sëmundjen paraqesin një rrezik minimal për të bartur infeksionin.
Po ashtu, personat e vaksinuar janë të mbrojtur edhe nga variantet e reja të koronavirusit, që janë treguar shqetësuese në disa vende të botës, tha Tolaj për REL.
“Sa i përket bashkatdhetarëve tanë që janë duke ardhur, duhet ditur se një numër i vendeve prej nga vijnë këta persona, tashmë janë në kulimin e vaksinimit të tyre. E mira do të ishte sikur ne në Kosovë të kishim një pjesë më të madhe të popullatës të vaksinuar”, thotë Tolaj.
