Driton Selmanaj, në seancën e sotme të Kuvendit, ka folur për shkarkimin e Valedete Dakës, raporton InLajmi.
Deputeti i Lidhjes Demokratike të Kosovës, e ka cilësuar këtë vendim të marrë nga Presidentja Osmani si një precedent të rrezikshëm e skandaloz.
“Sipas vlerësimit tonë, një vendim i tillë paraqet një precedent të rrezikshëm dhe skandaloz. Veprimi i tillë nuk mund të kuptohet ndryshe pos për realizim të qëllimeve partiake”.
Selmanaj tha se sipas Kushtetutës, presidentja nuk ka të drejtë shkarkojë por mundet vetëm të emërojë kryetarin e KQZ-së.
“Duhet t’i kujtojmë presidentes, se Kushtetuta nuk e ka paraparë shkarkimin e kryetarit të KQZ-së nga ana e presidentes, por vetëm emërimin. Arsyetimet që janë dhënë më tepër ngjanin me një pamflet politik, sepse në një mënyrë të pakuptimtë presidentja e merr rolin e katër institucioneve tjera”, tha Selmanaj tutje.
Ai akuzoi presidenten e vendit se po cënon funksionimin e institucioneve, duke thënë se nëse nuk e ndalojnë tani këtë gjë veprime të ngjashme do përsëriten.
“Presidentja e mazhoranzës parlamentare në vend që të garantojë funksionimin e institucioneve, ka zgjedhur që t’i cënojë ato. Po atakohet institucioni që ka dëshmuar se është shembull për të gjithë rajonin për administrimin e proceseve elektroale. Nëse nuk e ndalim tani, veprime të ngjajshme do të përsëriten përsëri”. /InLajmi/
