Ushtruesja e detyrës së shefes së Grupit Parlamentar të Vetëvendosjes, Mimoza Kusari-Lila bashkë me ish-ambasadoren e Kosovës në Shtetet e Bashkuara të Amerikës, Vlora Çitaku kanë reaguar mbi deklaratën e emisarit për dialogun Kosovë-Serbi të BE-së, Miroslav Lajçak i cili tha se nëse Kosova nuk i beson BE-së mund të shkojë diku tjetër.
Kjo deklaratë erdhi pas pyetjes në një tryezë diskutimi për liberalizim të vizave për kosovarët.
Kusari-Lila e cilësoi si arrogante deklaratën e tij dhe shtoi se nëse Lajçak nuk i pëlqen puna e tij më mirë është të shkojë diku tjetër.
“Një moment për t’iu përgjigjur Miroslav Lajçakut, nëse nuk e doni punën tuaj, ndoshta më mirë është të shkoni diku tjetër. Çfarë deklarate arrogante nga dikush që supozohet të ndihmojë dy shtete për tu afruar me Bashkimin Evropian dhe të mos shikoj tutje”, ka thënë shefja e GP të LVV-së përmes një postimi në Twitter.
Se Lajçak është treguar arrogant ka thënë edhe ish-ambasadorja e Kosovës në SHBA, Vlora Çitaku, derisa ka shtuar se nëse BE dështon në fqinjësi atëherë është pothuajse e pamundur që burokratët e BE-së të merren me vende të largëta.
“Arrogant. Ekstremisht arrogant. Zgjerimi nuk është projekt altruist. Për më tepër, nëse Bashkimi Evropian dështon në fqinjësi, atëherë si presin burokratët e BE-së, të merren seriozisht me vende më të largëta dhe shumë më komplekse”.
Deklaratën “arrogante” të Miroslav Lajçak e ka treguar Samir Behariq, hulumtues në Forumin Ballkanik i cili ka thënë se Lajçak i është përgjigjur në mënyrë neveritëse pyetjes së tij, përcjell KlanKosova.
“E pyeta Lajçakun se pse liderët e Ballkanit Perëndimor duhet t’iu besojnë premtimeve të BE-së, përderisa BE-ja ka dështuar që të liberalizojë vizat për Kosovën dhe të nisë bisedimet për pranimin e Maqedonisë së Veriut. Përgjigjja e tij ishte e neveritshme: “Nëse nuk i besoni BE-së, shkoni diku tjetër”, shkroi Behariq.
