Është dorëzuar në Kuvendin e Kosovës, peticioni me nënshkrime për faljen e gjobave gjatë pandemisë, raporton InLajmi.
Peticioni është nisur nga Partia Socialdemokrate e cila ka mbledhur 11.000 nënshkrime, në të gjitha qytetet e Kosovës.
Aktivisti i kësaj partie Nol Nushi, tha se do të dorëzojnë këto nënshkrime për të kërkuar nisjen e Projektligjit për faljen e gjobave.
“Ne si qytetarë dhe aktivistë politik kemi mbledhë nënshkrime në çdo qytet të Kosovës dhe kemi mbledhë mbi 11.000 nënshkrime të përmbledhura në 16 folderë”.
Nushi u shpreh se këto gjoba janë shqiptuar në mënyre jologjike dhe më nuk kanë ndonjë efekt.
“Arsyeja e kësaj kërkese është sepse këto gjoba kanë qenë jologjike dhe kanë qenë të efektshme vetëm në kohën kur kanë ekzistuar masat”.
Ai më tutje tha se për të marrë këtë hap janë shtyrë nga fushatat elektorale të partive politike që janë mbajtur në kohë pandemie, pa respektuar ndonjë masë dhe nuk janë dënuar nga askush.
“Një rol të madh në shtytjen tonë e ka pasur fushata e partive politike që nuk e kanë respektuar asnjë masë. Janë ndarë më shumë se 200.000 dënime, që i bie se 10% e qytetarëve janë dënuar në ndërkohë nuk kemi vaksina, ndihma ekonomike dhe po gjobiten qytetarët”.
“Është me urgjencë dorëzimi i këtij peticioni dhe bërja e një projektligji. Ne mendojmë që në mënyrë urgjente të futet në rendin e punës, të futet në seancë dhe ta votojnë 120 deputet këtë projektligj”, përfundoi Nushi./InLajmi/
