Vendet anëtare të Bashkimit Evropian kanë rënë dakord të mërkurën 16 Qershor, të heqin kufizimet e udhëtimit për udhëtarët nga 8 vende dhe territore duke përfshirë, Shqipërinë, Serbinë dhe Maqedoninë e Veriut.
Përveç 3 vendeve të Ballkanit Perëndimor, në listë janë edhe Shtetet e Bashkuara, Hong Kongu, Makao, Arabia Saudite dhe Tajvani.
Pavarësisht vendimit, ndonjë nga shtetet anëtare mund të vazhdojë të kërkojë test negativ për koronavirus ose një periudhë karantine.
Çështja e shëndetit është në kompetencën kombëtare të secilit shtet anëtar të BE-së, prandaj, edhe në rast se disa vende deklarohen të sigurta, secili vend i BE-së ka të drejtë të vendosë masa për të luftuar koronavirusin.
Për të siguruar statusin e një vendi të sigurt, ai duhet të regjistrojë maksimum 75 raste pozitive me koronavirus për 100.000 banorë, në 14 ditët e fundit.
Në muajin Maj, Këshilli i BE-së hoqi zyrtarisht kufizimet në udhëtimet jothelbësore për shtetasit e vendeve të 3-ta, të cilët janë vaksinuar me të gjitha dozat e kërkuara të vaksinës kundër koronavirusit, raporton REL.
Shtetasit e vendeve të 3-ta përfshijnë edhe qytetarët e Ballkanit Perëndimor.
