Presidentja Osmani me vendimin për shkarkimin e Dakës nga KQZ, ka marrë përsipër rolin e 4 institucioneve të reja, kështu është shprehur Albert Krasniqi nga “Demokracia Plus”, përcjell InLajmi.
Duke shtuar se presidenti i Kosovës ka shumë kompetenca, por jo aq sa e mendon Presidentja Vjosa Osmani, Krasniqi e ka cilësuar vendimin e saj për shkarkimin e Valdete Dakës si një ndërhyrje që nuk duhet lejuar. Ai ka kërkuar nga deputetët që të çojnë në Gjykatë Kushtetuese këtë vendim.
Postimi i plotë i tij:
Kompetencat e Presidentit të Kosovës janë të shumta, por jo aq sa po mendon Presidentja Osmani-Sadriu. Në vendimin për shkarkimin e Kryesueses së KQZ-së, ajo ka marrë rolin e katër institucioneve të tjera:
- Gjykatës Kushtetuese, duke i interpretuar vet kriteret për certifikim të kandidatëve për deputetë;
- Kuvendit, duke vlerësuar punën e KQZ-së;
- Panelit Zgjedhor për Ankesa dhe Parashtresa, duke konstatuar shkelje në verifikimin e votuesve jashtë vendit;
- Agjencisë për Informim dhe Privatësi, duke konstatuar shkeljen e të dhënave personale.
Kjo ndërhyrje e pashembullt nuk duhet të lejohet. Përndryshe është fitore për lajmet e rrejshme të shpërndara gjatë zgjedhjeve për KQZ-në, për bullizmin politik të Sami Kurteshit e për ndërhyrjet arbitrare të Presidentes në punën e institucioneve të pavarura.
Avokati i Popullit ose 30 deputetë, duhet patjetër të kërkojnë nga Gjykata Kushtetuese vlerësimin e kushtetutshmërisë së vendimit të Presidentes për shkarkimin e Kryesueses së KQZ-së./InLajmi/
